Charine Solognier-Croes ta empleado di luna di augustus di Hospital

ORANJESTAD (AAN): Charine Solognier-Croes, jr. system-/netwerkbeheerder na departamento di IT,

no a sospecha net nada ora el a drenta bek su oficina despues di lunch. Un sorpresa grandi el a topa cune na momento cu su famia, coleganan y miembro di Hunta di Directiva Gregory Croeze a dal e grito di ‘surprise’. Un rato el a keda den shock prome cu a realisa cu nan tur t’ey pa celebra su bunita nominacion di empleado na Hospital pa luna di augustus 2025. Un momento super special cu sigur nunca e lo lubida. Charine su motivacion y dedicacion ta un ehempel pa tur. E ta wordo mira como e ‘boss lady’ di su departamento: cariñoso, atento y semper cla pa yuda.

Charine ta un ‘yabi’ esencial den e team; e conexion entre e departamento di ICT y e resto di Hospital. Su actitud accesibel y confiabel ta haci cu coleganan ta sinti nan mes sigur pa acerc’e pa ayudo y conseho. E no ta husga y ta un colega agradabel pa traha cu ne, ta scucha cu hopi atencion, ta comunica y duna feedback na un manera cla y semper ta proactivo den hunto busca solucion. E ta traha duro y tin e mentalidad di bay ‘the extra mile’ pa sigura cu su servicio di asistencia ta ‘on point’.

Tur colega ta di acuerdo cu Charine stima su trabou. E ta mantene su conocemento y abilidadnan semper ‘up- to-date’. E ta sigui desaroyonan di cerca y ta aplica loke e ta siña di biaha pa asina keda efectivo y profesional den su trabou. E ta mira retonan for di diferente perspectiva y na un manera structura e sa di busca solucionnan rapido y eficiente. Sin duda e ta contribui continuamente ne progreso di e departamento.

Manager di Sistema y Infrastructura, Jonathan Odor, ta conta cu Charine ta e ‘Eye of the hurricane’. “Charine t’esun cu ta keda calmo den cualkier situacion y ta e lijm cu ta wanta henter e team hunto.”

Hunta di Directiva, management y coleganan ta hopi contento y orguyoso di tin Charine den team di HOH. Masha pabien cu e reconocemento bunita aki!