Mientras salida di petroleo ta wordo amenaza pa expansion di negoshi mundial
*Entrega di gasolin na Aruba despues di cualkier cambio mester wordo splica
*Espectativa petrolero internacional 2026 mester wordo presenta na publico
ORANJESTAD(AAN)—Kico ta bira e futuro di entrega di gasolin na Aruba? Esaki ta e pregunta cu ta surgi imediatamente despues cu ayera a bira conoci cu benta di Citgo ta wordo conclui na Merca, caminda Citgo lo ta pasando directamente den man di otro doño.
E situacion cu ta desarotya awor na Merca pero cu resultado directo pa Aruba a cuminsa na 1986, ora sesenta porciento di Citgo a wordo bendi na Petroleos de Venezuela, cu na 1990 a cumpra e resto di accionnan di e refineria situa na Merca.
Citgo tabata representa pa Venezuela diez porciento di e benta domestico di azeta na Merca y un bon forma pa azeta di Venezuela alcansa e consumidor Americano.
Tabata Presidente Venezolano Hugo Chavez cu a dicidi cu no tabata un bon negoshi pa Venezuela y a entrega na Rusia casi mitar di e accionnan di Citgo como garantia pa prestamo biyonario y e resto a bay como bonds na companianan Mericano cu ora Venezuela no por a cumpli cu su areglonan financiero a hiba e asunto dilanti Huez.
Ta den un situacion caotico di e compania Venezolano na Merca, Aruba a drenta un deal cu Citgo, cu despues por a wordo anula y e yabi di e refineria di Aruba a bolbe pa Aruba.
Mientras e yabi a bolbe, un areglo cu a keda existi tabata e entrega di combustibel dor di Citgo na Aruba cu cambia entre otro tur su ponpnan di gasolin pa destribuidornan local di Citgo.
Huez a duna razon na e companianan cu ta busca nan razon pa wordo recompensa pa e problemanan cu nan ta enfrenta debi na e hecho cu Venezuela no a cumpli cu su compromisonan financiero cu nan.
For di ayera na Merca informacionnan tocante e desenlace di Citgo den e situacion actual ta na discusion debi na e compromisonan cu e compania tin.
Uno di e problemanan mas serio entre Venezuela y Merca ta e hecho cu Venezuela a perde su poder den Citgo na Merca debi na e medidanan cu Gobierno Mericano a tuma y awor e benta di accionnan di Citgo.
Un situacion sumamente serio a presenta cu pa Aruba ta bira urgente pa atende debi na e hecho cu ta Citgo a keda encarga cu entrega di gasolin na Aruba.
Informantenan clave a mustra IDARIO, cu na diferente ocasion a trece e asunto aki dilanti cu na Aruba mester atende cu e resultadonan cu entrega di combustibel na Aruba pa medio di Citgo, lo conoce.
Manera a wordo indica ayera, mientras ya na Merca e proceso den Corte a culmina, Aruba mester ricibi informacion awor di e realidad di Citgo cu a keda encarga cu combustibel na Aruba loke ta nifica cu cambionan den Citgo lo afecta e situacion local di loke por considera un asunto sumamente importnte den e base comercial y economico na Aruba cu resultadonan pa henter e comunidad.
Segun informantenan e moimento a yega pa na forma concreto publico wordo poni na haltura kico ta pasa actualmente cu e compania Citgo y kico Aruba mester spera di un desenlace debi na e accionnan dilanti Huez cu companianan Mericano a encamina.
Pa Nicolas Maduro e situacion actual ta nifica cu e compania a wordo secuestra dor di Merca. Pa Aruba e ta nifica un asunto pendiente cu loke ta base di funcionamento di e pais cu ta combustibel cu economia di Aruba mester,
DIARIO ta keda den contacto directo cu informantenan, cu di ta di opinion cu mester duna splicacion debido na e publico na Aruba cu ta mira e nomber Citgo directamente mara na su combustibel pero no ta ricibi informacion di loke ta desaroya cu e compania Citgo.
Na mes momento mester bira tambe conoci kico e desaroyonan mundial cu azeta ta. Tur informacion cu ta drenta ta indica cu e acuerdonan ariba salida di petroleo ta na peliger y cu mas y mas pais ta deshaci di e acuerdonan alcansa pa pone fin na petroleo proximamente.
Informacionnan clave cu a wordo entrega na DIARIO ta mustra ariba expansion di negoshi di petrolero den region di Caribe cu mas y mas actividad di companianan petrolero den e region.
Mientras prijs di petroleo te awor a keda abou y ta wordo spera cu esaki lo ta e caso tambe na 2026, cantidad di pais prpoductor di petroleo ta sigui amplia nan negoshi y e salida di petroleo, cu mester a trece cambionan grandi economico na mundo, ta na disputa.
DIARIO den su proximo edicionnan lo entrega na su lectornan mas informacion sumamente importante ariba desaroyonan petrolero y cambionan cu ta wordo haci mundialmente den e agenda cu a wordo introduci y lo a afecta economia internacional!
Informantenan den bista di e desaroyonan mundial ta di opinion cu e seguridad di combustibel mester wordo splica awor na publico di Aruba mas aleu cu e prijsnan cu a baha debi na circumstancianan internacional.
