Aruba a conoce un Bombacional Parada di Carnaval 69

ORANJESTAD (AAN): Loke a socede Diadomingo riba caya na Playa cu e parada di Carnaval 69, ta comosifuera cu e speranza asina largo pa e evento aki regresa desde cu e Pandemia a cuminza, a cristaliza su mes den un climax di ambiente y gozo festivo hamas antes bisto!

   E beis di tur participante, cu e sonrisa constante y animo pa sigui balia tanto den e solo cayente of den awacero, a demostra cu Aruba tabata anhela di hopi tempo caba pa Carnaval a regresa!  Y el a bin bek cu un estilo di grandslam cu tur hende a anticipa.

   Henter dia, hendenan a lubida tur sorto di polemica cu tabatin durante e dos lunanan aki, e pleito na radio, e discusionnan fuerte na oficinanan di trabao, y na final ta tur hende a goza sin fin di e fiesta di pueblo.  Y tambe mayoria di nan a keda contento cu Casper cu su cancion a bira Roadjam 2023 tambe.

   Cada grupo di Carnaval a sa di duna nan mihor prestacion y servicio na e participantenan!  Algun tabata ofrece servicio di bebida hasta riba caya mes na e participantenan, y tambe dunabo yudanza mesora si acaso algo na bo disfraz kibra of daña.

   E servicionan di Bar tabata un di e mihornan ultimo tempo.  Musica tabata tembla tur hende riba caya, cu bon sonido di calidad, cu cancionnan cu a dal duro danki na Groove Masters, y tambe na Buleria cu diripiente a sorprende tur hende cu nan gueststar Mighty Talent na mic.

   Y e ambiente aki no a wordo djis sinti entre e participantenan riba caminda, ya cu nan energia y vibe a wordo traspasa sin problema na publico na banda cu a coopera pa anima e participantenan, jump cu e cancionnan candeloso, y saca potret y selfies sin stop.

   Un trabao hopi respetable tambe a wordo nota di parti Cuerpo Policial, cu a coordina e fluho di e parada.  Claro cu a topa cu esnan cu a mira mucho den e boter, y pa algun otro motibo mas a detene 22 persona durante e evento.

   A nota cu e servicio di Emergency Medical Service cu a reemplaza Rode Kruis e aña aki tabata bastante visible durante e parada a lo largo di e ruta.

   E parada a start pa 11:00 am, y e ultimo grupo a yega final pa 6:55 pm.