Rumornan falso a circula riba 86 caso di variante Delta - ORANJESTAD (AAN): Crisis Team y Departamento di Salud a indica cu e datonan colecta durante e siman di 9 pa 15 di juli ta mustra cu 41 caso positivo nobo a keda registra di cual 22 ta residente y 19 ta turista.
Tambe a recupera un total di 15 persona cu ta haci cu ayera 16 di juli Aruba tin un total di 60 caso activo di cual 29 ta residente y 31 ta turista.
Ta mira toch cu e cantidad grandi di turista cu ta casonan nobo of cu ta parti di e casonan activo ta casi mitad di e total.
E average di casonan positivo pa dia siman pasa tabata 4 y e siman aki el a subi di 4 pa 6 caso pa dia.
Siman pasa tabata tin un averahe di 'positivity rate' diario di 6%, e siman aki el a aumenta na 7% diario.
Casonan di fayecimento relaciona cu COVID ta aumenta na 108 cu fayecimento di 1 residente mas. Condolencia y forsa na famia di e fayecido.
Hospital ta informa cu actualmente tin interna riba piso general di COVID 4 persona y den ICU tin 3 persona.
Crisis Team a remarca cu tabata tin rumornan ta circula cu lo tin un cantidad di 86 caso di e variante Delta, pero esaki NO ta berdad.
