Renobacion na Mabon ta trece orguyo y speranza pa su habitantenan

ORANJESTAD (AAN): Plan amplio di revitalisacion di bario cu a anuncia prome cu fin di aña, e proyecto di renobacion di e flatnan na Mabon,

pronto lo yega na su fase final. E iniciativa ta parti di un esfuerso mas grandi pa drecha, modernisa y embeyesa diferente bario, creando un ambiente mas digno, sigur y agradabel pa e residentenan.

   Durante e proceso, diferente habitante a comparti nan experiencia y satisfaccion cu e cambionan realisa.

Julitza Croes, ama di cas, cu ta biba den e flat pa hopi aña, a expresa su emocion ora el a mira e transformacion:

   “Nos flat a pasa di colorido den pasado, pero awo nos ta mira un cambio real. E renobacion a keda hopi bon. Nan a traha lihe y di calidad. Awo nos por bisa cu nos tin un lugar mas bonito pa biba.”

   Un otro residente, Jadrick Lampe, cu ta biba den e flat pa shete aña, tambe a comparti su gratitud. El a destaca cu e cambionan, manera porta y bentana nobo, color modernisa y mehoracion structural a crea un ambiente mas fresco:

   “Ora bo mira tur loke a cambia, e ta manera un cas nobo. E ta motiva bo y e ta haci bo sinti orguyoso di unda bo ta biba. Mi ta gradici tur hende cu a haci esaki posibel”

   Segun informacion for di e contratista, e trabaonan a inclui cambio di bentana porta, mehoracion di muraya, siguridad riba trapi, portanan di entrada y salida, organizacion di parking y un color nobo pa e fachada. Tur esaki, ehecuta den un periodo relativamente cortico, manteniendo coordinacion estrecho cu e habitantenan.

   Lo mas importante, segun e habitantenan, ta e sentimento di orguyo y renobacion cu e proyecto a trece. E flat cu antes tabata mustra señalnan di desgaste, awo ta representa un simbolo di progreso y atencion pa bienestar di e comunidad.

   E proyecto na Mabon ta un ehempel concreto di con inversion den bario por impacta directamente calidad di bida di su residentenan, no solamente den infrastructura, pero tambe den autoestima y sentido di pertenencia.