CEDEHM Aruba ta invita comunidad pa participa na nan accion social ‘Food and Clothes Drive’

ORANJESTAD (AAN): Den conexion cu celebracion di Dia Internacional di Hende Muhe, Centro di Desaroyo di Hende Muher – CEDEHM,

ta lansa su accion social bou di e titulo #GiveToGain. Esaki ta un iniciativa basa riba solidaridad, dignidad y compromiso social.

Señora Jahaira Valdez di CEDEHM Aruba a informa cu, den colaboracion cu Red Cross Aruba, e organisacion ta organisa un Food and Clothes Drive pa yuda hende muhe mas vulnerable na Aruba. E colecta ta enfoca riba recoge alimento cu no ta daña lihe y paña den bon estado, cu lo bay directamente pa hendenan muhe cu ta pasa momentonan dificil. Pañanan por ta di baby, mucha muhe y mucha homber di tur edad te cu adulto.

E aña aki tin un significado special, pasobra CEDEHM ta celebra su 15 aña di aniversario — un logro cu ta marca mas cu un decada di trabou den defensa y empoderamento di hende muhe na Aruba.

CEDEHM ta invita tur miembro di comunidad, famia, grupo na trabou, companianan y organisacionnan pa participa activamente y contribui generosamente door di hunto colecta paña y comestibel cu no ta daña.

Diasabra dia 7 di maart, di 10or di mainta pa 4or di atardi por entrega esakinan na Avenida Milo Croes 28 (tegenover di Van Dorp na Dakota). Hunto nos ta duna. Hunto nos ta gana.

Pa mas informacion of pa coordina donacionnan, por tuma contacto cu CEDEHM na 588-1391.