Renobacion Carismatico Catolico ta celebra den luna di October 45 aña na Aruba

ORANJESTAD (AAN): Un relato cu DIARIO a ricibi di Eric Illes MA, ta mustra cu documentacion di Renobacion Carismatico Catolico na Aruba,

ta minimo. For di anuncio y foyetonan di congreso y actividadnan nos ta purba duna, a peticion, un reconstruccion di e movimiento riba nos isla.

   Den iglesia Catolica movimiento Carismatico (of Pentecostal) a cuminsa na aña 1967 na Estados Unidos na Universidad di Duquesne,Pittsburg durante un fin di siman di retiro. Dentro di 23 aña e movimiento a crece cu mas di 100 millon catolico miembro den mas di 238 nacion entre nan, Aruba.

   Renobacion ta enfatisa e relacion y compromiso personal di cada individuo cu Cristo Hesus den su iglesia, pa medio di e poder di Spirito Santo, manera a sosode dia di Pentecoste y describi den  boeki di Echonan capitulo 2. Esnan den renobacion carismatico Catolico tin e conviccion di a keda llená y batizá cu e Spirito Santo.

   Mayoria biaha pa medio di ponemento di man. E nuebe señalnan di a keda llená cu e Spirito Santo ta sabiduria,conocemento,fe, sanacion, podernan milagroso, profecia, discernimiento, don di palabra y interpretacion di lenga, manera describi den 1Cor.12. 8- 10. Cada Carismatico ta worde considera di mester por actua di acuerdo cu e prome Carismatico esta Mama Maria kende a keda yena cu poder di Spirito Santo (Mt 1 y MC 1). Di ey Mama Maria a sali pa sirbi y a canta alabansa na Señor e Magnificat. E dos componentenan aki sirbi bo prohimo y alaba Señor, ta forma parti integral di e bida di un Carismatico.

    Via Trinidad y Curaçao, un diez aña despues di su inicio na Estados Unidos, na final di 1976, Pastoor Standenmeijer († 1978) a cuminza cu e prome grupo di oracion den Capilla di Tanki Leendert.  E grupo di orashon aki  haya e nomber di Shalom y ta reuni tur siman te dia di awe. Den su inicio Pastoor Standenmeijer tabata worde asisti door di e.o. señora Crisma Paulina q.e.p.d. Papa Juan Pablo 11 december 1979 tabata basta explicito. El a bisa di ta convenci cu e movimiento lo ta un componente importante den renobacion di iglesia. Vaticano 2 a skirbi di e donnan di Spirto Santo, cu “no ta solamente pa medio di e sacramentonan cu Spirito Santo ta santifica y guia e pueblo di Dios. E manifestacion di Spirito Santo ta duná na cada un, pa probecha di esaki”.

(1 Cor .12,7).

   Apesar di esaki claro cu no ta tur pastoor tabata asina entusiasma cu e movimiento aki. Gruponan carismatico mas bien, tabata lanta den parokia, na cas di famia. Fuera di cas di famia por ehemplo un hotel manera Basiruti, tabata pone un sala disponibel tur diabierne anochi pa grupo di oracion. Un grupo grandi tabata acudi aki bou gia di señora Ida Messman cu tabata gerente di hotel e tempo ey.

Poco poco den diferente parokia a cuminsa lanta gruponan di oracion den un forma mas structura. E grupo Carismatico di Savaneta, djis pa duna un ehemplo, a lanta na januari 1979. Por bisa cu na final di decada 70 casi tur parokia tabata tin un of otro grupo di oracion di Renobacion Carismatico Catolico. Cierto parokia tabata tin tambe grupo di hoben.

Pa haya instruccion y fortificacion lidernan carismatico tabata asisti na conferencianan carismatico na e.o. Trinidad and Tobago den e auditorium di University of West Indies, St. Augustine. Na Trinidad sra Deborah de Rosia y Ursula(Babsy)Bleasdell tabata lidernan prominente. Nan a bishita Aruba varios biaha pa duna enseñansa. E di siete conferencia di Renobacion Carismatico Caribense ( na ingles) a tuma lugar na 1990 bou e tema “Bay anto y haci e hendenan den tur nashon mi discipel”(Mt 28,19).

   E conferencia a conta cu representantenan di 22 pais entre otro Antigua, Aruba, Bahamas Barbados, Belize, Bermuda, Curaçao y Bonaire, Dominica, Grenada, Guyana, Montserrat, Jamaica, Islanan Ariba, St. Croix, St. Vincent y tambe Surnam. Fuera di charlanan di entre otro Fr. Tom Forrest, director internacional di evangelisacion 2000 y ex director di e oficina internacional di Renobacion Carismatico, y conferencianan, tabata tin workshops di un bon nivel.

   Asina e lidernan tabata haya instruccion ariba entre otro, con pa prepara bo testimonio, e mensaje basico di Evangelio, con pa haci oracion cu un hende, encurasha Catoliconan pa biba nan fe, encurasha pa evangeliza, evangelizacion di hende homber, muchanan y hobennan, evangelizacion den e poder di Spirito Santo, defende bo fe contra spiritualidad falso y e bataya spiritual den evangelisacion.

   Igual na Miami lidernan di Aruba tabata asisti na conferencianan carismatico ( na Spaño) pa encurashamento y instruccion. Asina e di 12 conferencia di renobacion Carismatico Catolico a tuma lugar na Downtown Miami den e centro di convencion James L.Knight na Mei 24-26, 1996 bou di e tema “No tengan Miedo”. Aki tambe e conferencia a conta cu presencia y predica di entre otro e conocido Salvador Gomez, fundador di e organizacion evangelisadora “Trigo Ministerio de la Palabra”. Salvador Gomez y su equipo a bishita Aruba varios biaha riba invitacion di e Service Team di Renbocion Carismatico Catolico.

   E Service team di Renobacion Carismatico ta e organo cu ta coordina e actividadnan di e gruponan di oracion manera, seminario Bida den Spirito y seminario di formacion, conferencia y celebracionnan. Na cierto momento Renobacion Carismatico tabata consisti di 25 grupo di oracion rond Aruba, cu un por medio di 75 miembro pa cada grupo y nan kerngroep. Semper e Service Team tabata tin banda di dje un director spiritual. Den su prome dianan despues di pader Standenmeijer, e directornan spiritual pa algun aña tabata sucesivamente Padernan Bouwman o.p, y desde 1999 Pader Franssen o.p. Na mei 2009 despues di 10 aña, Service Team a tuma despedida di pader Franssen como director spiritual.

   Pa su celebracion di 45 aña Renobacion Carismatico naturalmente e sircumstancianan no ta permiti celebracion cu congreso den grupo grandi. Por probecha e ocacion si pa un biaha mas haci un refleccion cu si den nos tempo tin suficiente motivacion di miembronan di iglesia pa asumi e mishon personal cu ta encarna den e mishon di Cristo Hesus. Tambe por haci e pregunta cu si tin suficiente participacion di hobennan, y con pa mas promove liderato solido sosial y spiritual. Un otro pregunta ta cu si tin e motivashon y un sosten fuerte y cla di pati di clero pa cu e movimiento.Temanan cu 25 aña pasa a keda treci padilanti y cu ta keda actual.

   Na Curaçao e movimiento a cuminsa un aña prome na 1975. Curaçao a celebra su prome Congreso Carismatico Catolico dianan 6 te cu 8 di oktober di aña 2000. E tema di e congreso tabata “ Mi ta yen di goso pa Señor” ( Isaias 61:10). E meta di e congreso tabata pa haci un refleccion profundo riba 25 aña di experencia di Renobacion Carismatico na Curaçao y su influencia riba educacion i formacion spiritual di comunidad y e aceptacion y affirmacion den iglesia y e pueblo en general.

   Tabata spera cu e congreso lo resulta den recomendacionnan pa: motiva miembronan di iglesia pa asumi e mishon personal cu ta encarna den e mishon di Cristo Hesus, mas participacion di hobennan, promove liderato solido sosial y spiritual, motivashon y sosten mas fuerte y cla di clero y fielnan pa crecemento spiritual di e pueblo.