MEDELLIN: Pasaheronan abordo di un vuelo di Latam Colombia a denuncia via di social media, cu nan a haya nan ta colecta placa pa evita cu un pareha
y nan yiu muher ta wordo saca di e vuelo cu tabata prepara pa bula for di Medellin rumbo pa Cali.
E caso aki a bira viral riba Twitter, y a mustra cu e caso a socede Diahuebs siman pasa ora cu varios persona cu tabata aborda e avion, diripiente a wordo pidi pa stop di subi e avion, debi cu e trahadornan di Gate di e aerolinea mester a bay busca un pareha y bisa nan cu nan tin di paga e pasashi di nan yiu muher di 2 aña y 10 luna.
Tin hasta un video unda bo ta mira con un Gate Agent di e aerolinea ta splicando e tripulantenan cu e mucha muher chikito a pasa e limite di edad di un ‘baby’, esta cu solamente esnan bao di 2 aña por bula gratis sin mester cumpra pasashi.
Pasaheronan a cu a tende esaki, y cu e pareha no tin placa mas, pues lo tin di baha e avion, a dicidi riba nan mes pa cuminza colecta e 201.000 Pesos Colombiano (como US$ 53) pa paga e pasashi di e criatura.
“Ta increible e cosnan arbitrario cu ta pasa cu Latam Colombia. Nan kier a baha un baby di 2 aña y 10 luna pasobra e no a paga. Danki na tur pasahero di mi vuelo Latam 4289 cu nos a pone placa hunto pa paga e 201.000 peso pa asina e baby por bay cu e vuelo,” ta loke e pasahero Sebastián Narváez a denuncia riba social media.
Toch tin algun persona cu ta defende e aerolinea, bisando cu regla ta claramente poni, esta cu muchanan riba 2 aña tin di paga pasashi.
Pero Narváez a reacciona bisando cu e regla di Latam Colombia ta papia di “2 aña” y no ta papia di “24 luna”. Pues cu tanten cu e no cumpli 3 aña, e baby ta sigui di tin 2 aña di edad y no mester paga.
Latam Colombia a haye obliga na emiti un boletin unda nan ta bisa cu regla aeronautica di Colombia ta exigi pa seguridad, cu muchanan mas grandi cu 2 aña mester ta den nan mesun asiento. Pero toch a bisa cu nan lo drenta den contacto cu e famia pa splica e situacion di loke a pasa na Medellin, y lo pidi disculpa.
