Reforzando e resilencia economico di e isla ta fundamental pa recupera di Covid-19

ORANJESTAD (AAN): Recientemente a tuma lugar e evento annual di ATIA “Survived Covid, Aruba’s Great Pivot”. Prome Minister Evelyn Wever-Croes a hiba palabra den e evento enfatisando cu reforsando e resiliencia economico di Aruba, ta fundamental pa na recuperacion.

   Prome Minister a duna di conoce cu e anochi tabata sumamente ameno y informativo. “Pa mi loke mi ta hiba di awe ta e ambiente, animo, cooperacion y colaboracion pa traha hunto pa Aruba desde cu Covid-19 a bati na nos porta.”

   Como un parti sumamente interesante di e evento, tabata tin un panel di comerciante cu a trece padilanti con Covid-19 a afecta nan y na mes momento con nan a transforma e crisis den un oportunidad. Ohala e storianan aki por inspira hopi mas comerciante y persona nan na Aruba.

   Den e di dos panel Prome Minister y Minister Geoffrey Wever a elabora riba e vision di Gobierno y con pa hiba Aruba padilanti. Prome Minister a duna di conoce cu el a ricibi diferente feedback indicando cu e puntonan treci ta mustra hopi cla cu Gobierno tin un vision pa recupera y hiba Aruba padilanti.

   “Gobierno su mision y vision ta pa recuperacion di Aruba pa asina trece progreso y bienestar pa tur hende. Den e lineanan aki tur ministerio ta alinea.  Ministerio Economico ta alinea riba recuperacion economico, Ministerio di Enseñansa ta ainea riba e recuperacion door di prepara nos hobennan pa e periodo di recuperacion y tur otro ministerio ta dirigi riba recuperacion di nos pais den tur sentido”, Prome Minister a remarca.

   Un pregunta al caso cu a worde dirigi ta tocante e 12.6 % di recorte y kico lo pasa si bin un walk out masal y kico Gobierno lo haci pa evita esey? Prome Minister a splica cu e 12.6% ta un condicion di Hulanda pa Aruba haya sosten di likides. Manera Aruba ta para awor, nos mester 6 luna mas di sosten di likides di Hulanda. Januari te cu july ta proyecta cu aruba lo depende di esaki. Aruba a haya di Hulanda caba 900 miyon y ta calcula cu nos mester ainda 200 – 300 miyon pa nos cera e total di fianza na 1.2 miyon. Aruba ta depende di nan y Aruba mester cumpli cu e condicionnan. Den e siguiente lunanan Gobierno mester negocia ainda con ta bay paga back bou di interesnan mas faborabel.

   “Dus por tin walk out pero e no ta den man di Gobierno. Nos a pidi caba permiso pa stop di corta completo y solamente corta mita otro aña y nos ta pendiente decision di Hulanda. Nos tin dialogo constante cu sindicatonan pa evita cu cosnan menos bon pasa na Aruba. Mi ta respeta sindicatonan, mi ta riba mesun liña cu nan y lo kier debolbe tur hende nan placa back pero nos ta depende di Hulanda y mester cumpli cu e condicionnan un tempo ainda. Ban keda trankil, warda Hulanda contesta nos y depsues nos ta wak unda nos ta para”.

  Den e evento di ATIA, Prome Minister a enfatisa:

  “Nos a sobrevivi Covid-19, e pio crisis cu Aruba a conoce den e siglo aki. E pio crisis economico pa Aruba despues di ciere di LAGO. Pero nos a sobrevivi. Mi tabata sa cu lidera un pueblo lo no ta facil. Mi tabata cu lidera un pueblo den un crisis, lo no ta facil. Pero nunca mi a pensa mi lo biba den un evento di e magnitud aki mucho menos lidera durante esaki. 20 luna despues, ainda e ta parce ireal.

   Gabinete Wever-Croes, mesora a lora manga y traha mas duro ainda determina pa recupera. Reforsando e resiliencia economico di Aruba, ta fundamental pa na recuperacion. Pa recupera completamente, nos mester brasa manera nobo di pensa. E motto ‘business as usual’ ya no ta aplicabel. Nos mester enfoca riba crea empleonan nobo.

   Gobierno, hunto cu partners a diseña su strategia di recuperacion, ‘Repositioning Our Sails Master Plan’ no solamente pa provee un impulso temporal, sino pa pone e fundeshi pa crecemento economico a largo plazo. Un crecemento economico inteligente, inclusivo y sostenibel, cu ta enfoca riba reformanan structura pa conberti den economia resiliente”.