Rycond Santos do Nascimento ta confirma posicion DIARIO --- *Publicamente a admiti cu for di 2018 mester a tuma medida
ORANJESTAD(AAN)—Ayera Rycond Santor do Nascimento tabata topico na Aruba, caminda expertonan cu ta asisti DIARIO den informacion na Pueblo, tabata di acuerdo cu porfin un miembro di AVP ta trece dilanti cu prome cu pandemia, Gobierno Evelyn Wever-Croes a hereda un desastre financiero di Gobierno Mike Eman.
Den su declaracionnan publico e miembro di AVP a bay trata na lansa un atake contra Prome Ministro Evelyn Wever-Croes sin nota aparentemente, cu di e forma aki el a habri porta pa berdad cana drenta.
DIARIO a wordo poni na haltura di e informacionnan cu Santos do Nascimento a lansa pa trata na mustra cu e sindicatonan tin razon ora nan bisa cu no ta FASE so por ta e motibo pa medidanan wordo tuma na Aruba actualmente contra e gastonan di personal.
Informantenan experto di DIARIO a acerca nos directamente pa mustra con e thesis cu DIARIO a presenta, cu e problemanan actual cu pago di ambtenaarnan, tabata resultado directo di e forma cu Gobiernonan di Mike Eman a atende cu placa di pueblo.
Manera e politico di AVP a trece dilanti, no ta e pandemia di Covid-19 so a ocasiona e problema cu trahadornan di Gobierno pero for di 2018 Gobierno mester a restructura e gastonan di personal di Gobierno.
Lamentablemente Rycond ainda no kier sigui informa Aruba pakico for di 2015 Aruba a wordo forsa pa cuminsa tuma medida bou guia di CAFT, cu a haci su entrada pa sigura cu Aruba no ta gasta placa cu e pais no tin y asina sigui aumenta e debe nacional cu hunto cu e otro debenan manera PPS, ta e herencia di Mike Eman como Gobernante na Aruba.
DIARIO mientrastanto a bay den tur texto di informacionnan di Prome Ministro Evelyn Wever-Croes na 2020, a base di su negociacionnan cu Hulanda despues cu ya Aruba a adopta Aruba su presupuesto y a cuminsa tuma medidanan riba tereno di gastonan di personal.
Pa cuminsa Prome Ministro Wever-Croes semper a trece dilanti cu, manera CAFT mes tambe a mustra y DIARIO a proba cu documentonan, cu no por sigui subi belasting pero mester baha e gastonan di pueblo, manera a pasa hasta cu gastonan di e oficinanan directo di Prome Ministro Wever-Croes.
Semper Gobierno Wever-Croes a mustra cu problemanan financiero no a start cu e pandemia di Covid-19 pero cu e herencia cu Gobierno Mike Eman a laga atras y a haci cu Aruba a wordo confronta cu supervision.
Baha gasto tabata tambe exigencia pa yega na solucion di parti di sector priva di Aruba for di 2014, ora Aruba tabata na careda.
Ta importante awor pa Santos do Nascimento splica Aruba honestamente kico a pasa cu e pais ora Mike Eman a baha BBO na mita sin un reforma responsabel di belasting, cu na 2007 a conoce menos entrada dor cu a baha belasting directo pa introduci belasting indirecto cu ta BBO.
Ta den e wega di deshaci di BBO cu a duna Mike Eman poder, Aruba a cuminsa haci debe cu a bira peso pa e comunidad prome cu e pandemia a presenta.
Semper DIARIO a indica cu cifra no ta sostene ningun mentira. Cu cifra DIARIO a duna prueba di loke awe e Nascimento dos Santos mes ta trece dilanti ora e bisa cu for di 2018 ya Gobierno Wever-Croes mester a tuma medida y entre nan baha gasto structural di personal.
