'Reflections and Revelations': Prome Solo Expo di Fotografo Rafael Barragán na Cas di Cultura

ORANJESTAD (AAN):  For di dia 14 te cu 30 di september ta bay tin na Cas di Cultura un tremendo expo cu yama 'Reflections and Revelations' di e Fotografo y Comunicador Social Rafael Barragán.

            Esaki ta e prome 'Solo Expo' di Barragán kende a expresa den entrevista cu DIARIO cu loke e ta mustra den e expo aki ta e resultado di e momentonan cu e ta sinti cu e ta parti di Aruba. E momento cu e ta sali keiro rond di e isla y e ta sinti su mes agradecido di e luga aki y tur loke tin rond di dje.

            El a declara cu e ta saca potret tur caminda y esaki ta e resultado di e proceso ey di interpretacion di e ambiente y di e sentido rond di Aruba.

            "Danki pa duna mi e oportunidad pa crece y crea un hogar akinan", e artista a manifesta.
            El a invita tur hende pa pasa Cas di Cultura pa wak e potretnan ariba muraya pa asina por compronde mas di su proceso artistico. 

RAFAEL BARRAGAN 

            Rafael Barragán ta un fotografo cu ta radica na Aruba for di aña 2015. Su experiencia anterior como periodista den radio, television y prensa a influencia su manera di bira fotografo y su interes den conta historia.

             Como yiu di un nurse y un dokter, Barragán semper a tene contacto cu e momentonan masha priva di e pashentnan di su mayornan, algo cu lo a marca su vision di bida for di un edad tempran.

            E tabata intriga pa e sentimento di gratitud, tristesa, trankilidad y compromiso cu el a percibi den e experencianan aki. P'e, fotografia ta un herment pa yuda otro y pa expresa su mes na un manera honesto.

            Durante su carera, Barragán a colabora den diferente proyecto na Aruba cu organizacionnan como Switch Foundation, FAVI, Trampolin pa Trabao, Fundacion pa nos Muchanan, Counter Trafficking Task Force Aruba, y otro mas.

            Barragán a forma parti di e exposicion Nature & Faces na ArtisA Gallery den 2018, Caribbean Dialogs den 2021, Drawing with Light na Cas di Cultura den 2022, y tambe a participa den Aruba Art Fair na aña 2023.