A.T.A. a presenta e segundo sesion “Eco-Conscious” dirigi na socionan den e industria di turismo local

ORANJESTAD (AAN):  Aruba Tourism Authority (A.T.A.) a presenta e di dos sesion bou di capa di secionnan “Eco-Conscious” dirigi na socionan den e industria di turismo local.

Un sesion cu a ser presenta pa Marisol Sanchez – Communications Manager di A.T.A., y representantenan di agencia internacional Zeno Group cu a cumpli cu un investigacion extensivo hunto cu A.T.A., esta Stephanie Casanova SVP Consumer Communications, Amelia Brandt - Senior Vice President - Purpose & Impact, y Sherwin Francies - Senior Account Executive – Consumer. A  comparti e strategia nobo encuanto e programa “Aruba Promise”, c uta dirigi riba entre otro nos bishitantenan y ta delinea na nan e ‘Code of Conduct’ desea durante nan bishita.

            Na mei 2024, A.T.A. a presenta e prome sesion “Eco-Conscious” na socionan local cual a enfoca riba  tendencianan global, manera e movemento di “Slow Travel Tourism”, alabes e movemento di “Positive Impact Tourism” cu ta enfatisa y ta enfoca riba impacta e pais di bishita na un manera positivo. Ta di menciona cu despues di e prome sesion, A.T.A. a continua cu trabounan extenso pa asina cuminsa concretisa diferente plan di accion pa cu programa nan nobo y existente.

            Cu e di dos sesion, A.T.A. a comparti cambionan pa cu e programa “Aruba Promise”, esta e “Code of Conduct” cu ta para p’e. E bishitante ta wordo pidi pa compromete su mes y firma e promesa cu ta delinea cu e lo comporta su mes di un manera cu ta yuda Aruba protehe locual ta importante pa nos y mehora nos isla conforme locual nos ta haya ta importante. Globalmente, por nota mas y mas e tendencia pa atrae e bishitante cu ta mas responsabel y sostenibel pa e destinacion. E bishitante cu ta laga e pais miho cu e la hay'e. Pa A.T.A., esaki ta di sumo importancia! Desaroya Aruba den conformidad cu practicanan sostenibel, ta exigi cu e bishitante tambe mester ta un huesped responsable y respetuoso na e país cu e ta bishita.

            Cu e “Aruba Promise” y “Code of Conduct” actualisa, A.T.A. ta enfoca na crea conscientisacion riba e promesa y comportacion, caminda cu ta urgi e bishitante pa priminti nan mes di disfruta di e destinacion segun un comportacion respetuoso y responsabel. Tur esakinan ta esfuersonan cu A.T.A. a bin ta traha riba dje. Durante di e sesion por a tuma nota cu socionan local tambe ta mira den e direccion aki.

            Pa logra esaki, A.T.A. ta implementando un plan di comunicacion mas extenso cu lo inclui e comunidad local, socionan local, e aspecto di educacion, compromiso, y participacion, cu e meta pa hunto como organisacion, comunidad, y socionan local por bay den e direccion mutuo.

            A.T.A. ta gradici socionan local cu tabata presente durante e di dos sesion, y ta conta cu participacion pa otro sesion den futuro cercano.