Refinanciamento di debe di COVID ta un topico di atencion durante e reunionnan na Hulanda

ORANJESTAD (AAN):  Parlamentario Shailiny Tromp-Lee di Fraccion di MEP a indica cu Diamars ultimo, dia 5 di dec 2023,

hunto cu coleganan Vrolijk y Christiaans-Yarzagaray, el a reuni cu miembro di Eerste Kamer sr. van Hattem di e partido PVV.

            Sr. Hattem ta miembro di Commissie Koninkrijksrelatie di Hulanda y ta den Eerste Kamer desde 2015.

            Mirando e resultado di eleccion na Hulanda y e negosacionnan cu ainda ta andando cu Hulanda encuanto e refinanciamento di nos debe di COVID, a mira e necesidad pa sinta cu colega Van Hattem.

            Durante e reunion sigur nos a trata un biaha mas e proceso encamina pa loke ta trata e leynan di consenso cu Hulanda a pone como exigencia pa duna sosten financiero. Enfatisando e hecho cu a bari COHO for di mesa pero keto bay e Rijkswet supervision financiero ta keda exigi no obstante cu tur argumentacion uza pa “mata” e COHO ta conta pa RAft tambe. Sin descarta e hecho cu ya Aruba tin un supervision financiero desde 2015 regla via un ley nacional.

            Mirando e hecho cu dentro di poco Parlamento di Aruba ta bay trata e cambionan den LAft, a trata e aspecto aki tambe cu su persona. Nos a indica cu nos ta asumi responsabilidad y ta percura pa e base legal pa e supervision financiero existente ancrando e normanan “nobo” den e ley mirando cu e Protocol al respecto ta vence dia 31 december 2023.

            A base di e distertacionnan den Eerste Kamer durante di e reunion encuanto presupuesto supletorio Binnenlandse Zaken en Koninkrijksrelaties 2023 a enfatisa e realidad cu tin ora ta keda perdi for di bista, esta cu Aruba su situacion y trayecto di autonomia ta otro cu esun di nos hermana islanan Corsou y Sint Maarten. Tambe a subraya e hecho cu nos relacion financiero cu Hulanda desde 1986 te cu awor ta completamente otro cu esun di Corsou y Sint Maarten desde 2010.

            Sigur e strafrente cu Hulanda a aplica pa Aruba a keda trata extensamente, accentuando con nos ta experencia esaki. Algo incomprendibel y inhustificabel.

            Durante e reunion nos por a ripara y sinti cu e reunion cu nan tabatin recientemente cu nos Minister President sigur a haci un impacto positivo y cu e tabata bon na e altura di nos desaroyo macro economico y financiero.

            Mas cu claro nos a accentua cu nos ta gradici Hulanda pa e sosten financiero brinda pero nunca a spera e condicionnan mara na esaki. Nos a indica cu nos kier un bon relacion den Reino, a base di madures y respet caminda nos autonomia ta keda respeta, Parlamentario Shailiny Tromp-Lee a duna di conoce.