ORANJESTAD (AAN): Representante di pueblo di Aruba den parlamento a keda informa cu Minister President tin mester 2 siman mas pa por sigui traha ariba contestacion di su preguntanan haci.
Como parlamentario independiente mr. Gerlien Croes a dirigi un serie di pregunta na titular di Infrastructura, e propio Evelyn Wever-Croes, pa bin y contesta tocante e maneho hiba di Directie Infrastructuur en Planning (DIP).
E enfoke, na e ocasion aki, ta riba e propietarionan di edificio cu a viola nan permiso di construccion.
Un sentencia di hues na Curaçao recien a trece e topico aki back den atencion di parlamentario Croes. E decision tabata ta pa e departamento na nos isla ruman kita un permiso di construccion di e proyecto Pen Resort na Pietermaai, actualmente den ehecucion, pa motibo cu a construi un piso adicional cu ta bay contra ley.
T’asina cu na 2018 y 2019, Gobierno di Aruba a introduci un maneho nobo incluyendo un documento pa un acuerdo di dispensacion unico. Esaki tabata relacion cu e aplicacion di e ROPV nobo. Di e manera aki a informa tur propietario di edificio comercial na Aruba cu a traha piso extra cu nan a actua contra ley, pero tabatin un oportunidad pa drecha e fout aki. A instrui nan pa acudi na DIP y paga e suma di 243 mil Florin pa unidad extra of e ekivalente na 3.250 Florin pa meter cuadra di construccion previamente no autorisa.
Di e tempo ey caba tabatin parlamentario cu a lansa pregunta tocante e maneho aki den direccion di e ministernan di infrastructura anterior, tanto Otmar Oduber, como tambe Marisol Lopez Tromp. Sinembargo, e mal costumber di no duna oido na miembronan di parlamento ta bin for di e tempo ey caba.
A base di articulo 59 di Reglamento di Ordo di Parlamento di Aruba y articulo III.3 di Constitucion di Aruba, Parlamentario mr. Croes a dirigi formalmente su preguntanan na Minister President, como cu e ta titular encarga cu e departamento di DIP.
Entre e inkietudnan cu Parlamentario Croes tin y cu ta desea pa Minister Wever-Croes contesta ta cuanto persona a haci oido di e yamada, cu cuanto a yega na un acuerdo, cuanto ta e suma cu a drenta caha di gobierno danki na esaki y kico tabata e base legal di e acuerdo.
Parlamentario Croes ta keda atento na reaccion y contesta di Minister Wever-Croes den cual e lo por confirma e autoridad di Parlamento y brinda transparencia tocante su maneho. Manera ta conoci, DIP ta un di e departamento cu ta actualmente bou di varios investigacion penal, mientras ta hunga un papel cardinal den e desaroyo socio-economico di e isla.
