E di 13 edicion di torneo di golf caritativo di Kiwanis Club of Aruba a surpasa tur expectativa

ORANJESTAD (AAN):  Diadomingo 26 di maart, Kiwanis Club of Aruba (KCA), e service club cu ta existi desde 1964, a organisa nan famoso torneo di golf caritativo na The Links at Divi Aruba. 

E evento a wordo sosteni door di un record di 23 hole sponsors como patrocinador principal y alabes un cantidad di 100  hungado di golf, cu a surpasa tur expectativanan.  

            E fondonan recauda pa e aña aki a wordo aloca parcialmente na Famia Planea; AWG 5000 a wordo otorga pa asina aporta na nan proyecto di conscientisacion y educacion sexual integral dirigi pa mucha y hoben uzando videonan moderno den un estilo accesibel.  Un otro fundacion cu tin un proposito hopi importante y urgente ta Fundacion Contra Violencia Relacional (FCVR); AWG 5000 a wordo otorga na FCVR pa asina sigui construi nan Women’s and Children center, cu ta fungi alabes como un refugio y guia pa yuda mamanan sali hunto cu nan yiunan for di un situacion domestico peligroso.

            Durante e ceremonia oficial clausurando e evento, Guardian Group, cu ta un hole sponsor pero alabes a participa den e torneo cu un ekipo di hungado, a scoge e momento ey pa haci un donacion di AWG 5000 na Koningin Wilhelmina Kankerfonds.

            Jane Wever-Vermaas, miembro di KCA y chairman di e fundraising committee ta comenta: “ E evento tabata uno yena cu ambiente y competencia amical entre tur ekipo, por a ripara cu hende a echt pasa bon. Nos di e committee kier gradici di curason nos socionan y patrocinadornan principal pa unabes mas colabora hunto cu KCA como un ekipo solido pa logra e exito di nos 13 torneo di golf caritativo”.

            E ganadonan di e torneo ta como lo siguiente: 

Closest to the Pin: Ashiko Martinus

Longest Drive Ladies: Lorena Alvarez

Longest Drive Men: Robert Aldrich

Best Gross: Robert Aldrich, Marc Rigpstra, Peter Macnara, Todd Nadeau

Best Nett: Pierre Rafini, Greg Martis, Giovanny Atencio, Elvin Maduro

            KCA ta extende un danki di curason na tur hungado y sponsors pa nan sosten financiero den e torneo aki.