ORANJESTAD (AAN): E siman aki diferente Minister a traspasa carteranan na e personanan cu lo ta e proximo Ministernan encarga. Diaranson a toca turno di sr. Ursell Arends Lider di Partido Raiz,
cu a ricibi e dossier di e cartera di Integridad for di Minister President Evelyn Wever - Croes.
Awe Aruba tin un Bureau Integriteit cu ta un departamento cu tin retonan y trabaonan grandi pa garantisa integridad den e aparato publico. ‘Manera cu nos a wak e ultimo 4 añanan Minister President a lidera esaki y aworaki ami lo bay tin e oportunidad pa sigui duna esaki contenido, conhuntamente cu tur e profesionalnan cu a bin ta inverti nan tempo y creatividad pa haci esaki posibel caba’, sr. Arends a expresa.
Segun sr. Arends, unabes cu huramenta lo inicia cu trabounan pa percura pa
instalacion di e ‘Integriteitskammer’. Ademas lo bay traha duro pa introduci e “code of conduct/ integriteitsbeleid” den e aparato publico pa e ambtenaar y tambe na nivel di Minister. ‘Pueblo ta spera esaki di nos y di e forma aki nos por ta un ehempel pa henter e comunidad’.
Durante di e ultimo añanan tareanan grandi a wordo haci, e fundeshi a wordo traha caba pa integridad por wordo duna e prioridad y urgencia cu e merece. Esaki ta loke nos ta compromete nos mes na comunidad, cu den e proximo 4 añanan como Minister di integridad nos lo sigui duna esaki contenido pa asina aki mustra pueblo cu loke cu a wordo haci lo sigui haya e atencion debido pa asina integridad sobresali den e proximo 4 añanan un bes mas,’ sr. Arends a termina bisando.
