Director di AZV, Edwin Jacobs:
*Informe di Secretariado di CAft no ta corecto
ORANJESTAD (AAN) – Loke AZV ta yama e “quote di gasto di cuido” cu ta e gasto di cuido di AZV den porcentahe di GDP, ora cu pandemia a bin esaki a subi 10%, pero na 2023 a baha bao di e nivel 2019, cu tabata 7.2% di e GDP.
Asina Ir. Edwin Jacobs, director di AZV, a duna di conoce den entrevista cu DIARIO.
Jacobs a mustra un grafico di e Organizacion pa Cooperacion Economico di paisnan di Occidente (OCE), na unda por a mira tres punto di diferente color (no blauw), y un color blauw light cu e letternan LAC, cu ta indica e promedio di paisnan Latinoamericano y di Caribe, unda por a mira cu nan tin un grado di envehecemento di 7% y nan ta na un tiki mas di 7% di GDP.
Aruba, cu un grado hopi mas halto di envehecimento, ta na mesun nivel (gasto) cu Latinoamerica y Caribe. Esey ta nifica cu “somewhere” AZV su prestacion ta miho cu un pais cu tin menos grado di envehecimento, segun director di AZV.
E paisnan di West Europa, Brasil, Mexico, entre otro, ta na un promedio superior na 8% (casi 9%) mientras cu Aruba ta na un promedio di 7.2%, Jacobs a agrega.
“Den principio nos por conclui cu nos prestacion ta den lineanan cu paisnan rico, cu tin e forma di hacie un poco miho, loke ta implica cu te ainda nos tin un retraso cu nos tin cu ‘haal’e in’ pasobra kizas tin caminda cu nos no a duna atencion ainda. Pero en liña general, si bo compara esaki cu e rapport cu Secretario di Estado a manda aña pasa pa Tweede Kamer, informando nan cu nos gastonan ta fuera di control pasobra nos ta pasa e promedio di paisnan Latinoamericano, e informacionnan mas reciente di aña pasa ta contradeci completamente e rapport ey, cu a wordo traha pa e Secretariado di CAft”, Edwin Jacobs, director di AZV a subraya.
“Mi ta tribi di bisa cu nos gastonan ta den control, y e reto pa nos ta con pa sigui mantene asina e proximo añanan”, Jacobs a agrega.
