Director di AZV, Edwin Jacobs a relata:
ORANJESTAD (AAN)—Tur e trabao cu a tuma lugar den un aña (2023) na AZV, pa loke ta concerni maneho di gasto, ta hinca den un grafico cu director Edwin Jacobs a splica, den entrevista cu DIARIO, cu ta esun di mas importante. Paso pa paso el a splica cu pa 2035 lo yega momento cu si no traha un dam awo warda awa, lo no tin fondo mas.
Esaki pasobra e grafico aki ta mustra e resultado di e fondo di AZV, na diferente color. Jacobs a splica cu e resultado por ta surplus (blauw), of deficit (Cora bay abao). Pa 2023 e ta mustra un surplus grandi, pa 2024 e surplus ta bira menos, 2025, 2026 lo bira menos, 2027 casi nada, y na 2028 lo aparece e prome deficit atrobe, den e fondo.
“Kiermen, nos ta proyecta aworaki e crecemento economico ta bay boost bo entradanan, pero despues bo gastonan ta bay crece mas lihe cu e entradanan. Pa 2028 nos ta expect cu e primanan di AZV y BAZV no ta suficiente pa cubri e gastonan, y e ta sigui asina eynan te na 2040. E liña berde ta e reserva, anto kico ta forma e reserva? E surplusnan. Cada bez cu tin un surplus e ta wordo poni den un spaar pot. Tanten cu tin surplus, e liña berde ta subi; anto ora cu tin deficit, bo ta cuminza saca for di bo spaar spot baha bek abao”, Edwin Jacobs a relata.
El a agrega cu e ora ey ta bay ripara cu na 2035 lo yega e momento atrobe cu AZV lo bati na porta atrobe di gobierno pa haya Landsbijdrage, cu gobierno a declara caba cu AZV tin wak con ta sobrebibi, cu e fondo di BAZV y e prima di AZV.
“Pero e grafico aki ta bisa bo cu e proximo diez añanan lo no tin problema pa paga bo gastonan (AZV) pero ta alerta bo si, pa tuma e pasonan necesario pa hala bo liña mas cerca posible. Esaki ta necesario pa comunidad ta conciente cu berdad nos ta indica cu tin un surplus di 54 miyon, pero no ta un placa cu nos por bisa ‘ey ban haci un cos leuk cu ne’. E ta un placa cu nos tin cu pone un banda, manera nos grandinan ta bisa, traha dam, warda awa”, Edwin Jacobs, director di AZV a remarca.
