Pueblo kier sa pakico riba Green Corridor un Supermarket a haya ‘exit’ pero e Botica no

ORANJESTAD (AAN); Manera ta conoci, Green Corridor a wordo construi cu e protocol cu e ta un highway cu acceso limita. 

Pues no ta tur caminda bo por subi, of baha di e caminda.

   Sinembargo di trempan a cuminza haci excepcion pa e.o. e salida pa bo por bay na Long Fellow Bar y vecindario.

   Y awor na Pos Chikito, a habri recien un ‘exit’ tambe net pariba di rotonde di Pos Chikito, pa asina bo por bay na e Supermarket y Snack Trucks cu tin den e area.  E ta algo di aplaudi y sigur lo por bay reduci e fluho di auto cu ta pasa riba caminda secundario banda di e scol basico.

   Pero awor nan kier sa, di con Supermarketnan a haya e ‘exit’, pero banda pariba unda Pos Chikito tin su unico Botica, esey no a haya un ‘exit’.

    Pa bo yega na e Botica, bo tin di sea tuma e caminda cu ta bay Rooi Lamunchi y tuma algun short-cut cu ta ponebo pasa riba varios caminda di santo, prome cu bo por yega na e Botica.

   E ‘exit’ aki lo no djis yuda e Botica, sino e demas habitantenan eybanda tambe ora nan bin for di direccion di San Nicolas.

   Awor nan kier sa, di con Supermarket si, pero Botica no.  Posibilidad ta existi cu DOW lo a check e fluho di trafico pa ambos banda, y lo a conclui cu tin hopi mas vehiculo ta bishita un Supermarket tur dia, compara cu un Botica.