Proyecto BoekStart ta laga baby y peuter cera conoci cu buki hunto cu su mayor

Awor tin baby por bira miembro di Biblioteca Nacional

ORANJESTAD (AAN):  Biblioteca Nacional Aruba ta ofrece hopi buki pa baby. Awor tin un oferta special pa baby bira miembro di biblioteca. Mayor cu ta haci nan baby miembro di biblioteca ta ricibi un maletin cu buki regalo.

            E proyecto BoekStart ta un proyecto pa laga baby y peuter cera conoci cu buki hunto cu su mayor. E iniciativa aki tin como meta pa laga mayor y e chikitin cera conoci cu buki y lesamento.

Lesamento den bos halto pa baby ta stimula e desaroyo di idioma pero tambe ta fortifica e laso y conexion entre mama/tata y yiu.

            Ta recomendabel pa cuminsa desaroya e cultura di lesamento na cas di trempan.

            Mayor di baby di 3 luna te 2 aña di edad por inscribi nan yiu na biblioteca (Playa of San Nicolas) y nan ta ricibi un maletin chikito cu ta contene 2 buki. Un ta di tela y material suave specialmente desaroya pa un baby por hunga cu ne. E maletin chikito ta un regalo hunto cu e miembrecia.

            BoekStart ta un campaña pa stimula mayor bay biblioteca cu na yiu di chikito, prome cu nan cuminsa scol. Riba e website boekstart.nl por haya conseho con pa lesa cu bo yiu.

            Biblioteca ta ofrece un coleccion grandi di buki di prenchi pa baby y mucha chikito. Biblioteca ta duna e maletin di BoekStart tanten cu tin.