ORANJESTAD (AAN): Minister di Enseñansa y Deporte Endy Croes hunto cu su Ministerio y ekipo di maneho di IBISA a reuni riba e ultimo preparacionnan pe lansamento oficial di e proyecto escolar 'WE Aruba'.
Manera ta conoci cu den e vision y programa di gobernacion lo dedica hopi atencion na competencianan escolar. Pa cu esaki IBISA ta hunga un rol importante den e parti organisatorio. Bureau di Minister mes lo ta encarga pa carga e proyecto aki. Desde inicio di aña 2022 diferente scolnan ta competiendo caba den diferente disciplina. Un total di 8 scol lo clasifica den diferente disciplina; por ehempel 8 scol den futbol, 8 scol den basketball, volleyball etc etc. Esaki nan lo drenta e Weganan Escolar Aruba cual lo tuma luga entre 17 pa 25 di juni proximo.
Minister Endy Croes ta pre mira cu e lo bira un evento grandi fomentando competencianan entre scolnan y sigur esaki lo habri e caminda pa 2023 unda e competencia aki bira mucho mas grandi.
Den luna di mei a traves di un conferencia di prensa lo lansa e proyecto completo. Keda pendiente pasobra WÉ WÉ lo bay trece ambiente.
