Bon acogida Dia di Rey 2022 na Convento di Imeldahof

ORANJESTAD (AAN): Grandi y chikito a goza Dia di Rey na Convento di Imeldahof di e actividadnan organiza pa Museo Arqueologico Nacional Aruba (MANA) y Fundacion Kapel di Bethania (FKB).

Muchanan a hunga wega y hisa flie, mientras mayor ta sinta y apoya nan yiu. Famianan a participa na tayernan creativo, a bishita e exposicionnan y e kapel unico.  Den un ambiente ameno den e hardin a disfruta di dushi sopi y pasaboca.

   opi a haci uzo di e oportunidad pa saca bunita potret den famia of cu amigo den e ‘photobooth’ cu FKB a drecha special pa e dia aki. Alavez tabata tin bunita artesania special pa e occasion aki y tambe articulo religioso na benta.

   Museo Arqueologico (MANA) y FKB ta masha agradici na mr. Glen Lacle di Fundacion “Vrienden van het Sport Centrum San Nicolas”, y trahador di IBISA, cu voluntariamente a coordina e weganan popular na un manera asina dibertido cu e muchanan cu a participa a keda encanta. Otro actividad popular tabata cu e muchanan por a experiencia pa hisa flie. 

Pa medio di nan carchi di actividad muchanan a participa den e tombola di FKB pa cual diferente gremio y persona a pone premionan atractivo disponibel.  Banda di e carchi di actividad FKB a recauda fondo cu bar y cushina di sopi bon surti. Grupo Scout San Dominico tambe a recauda fondo cu nan tent di cos dushi y pasaboca.

Artistanan Gloria Feliciana y Erika Moran a ofrece dos tayer sumamente atractivo pa participantenan di 5 pa 100 aña. Pa un prijs special pa e celebracion di a Aña di Rey a siña mucha, hoben y adulto pa traha cadena di glas di lama y pintura riba canvas di un escena caribense. Alavez Fundacion 1403 tabata presente pa bende e catalogo di pintura riba baranca di Aruba.

MANA y FKB ta desea pa gradici un y tur cu a contribui pa haci e evento aki asina exitoso y en especial nos voluntarionan cu a dedica nan dia liber pa yuda. Nos ta bisa un danki grandi na Ministerio di Cultura y Comision Dianan Nacional cu a yuda cu tent y baricada y promocion, na IBISA cu a yuda pa formula e ideanan pa e weganan y a pone e materialnan pa e weganan disponibel, na prensa di Aruba cu a duna espacio den nan medionan di comunicacion pa informa publico di e evento, na Imeldahof cu a pone nan veld disponibel pa hisamento di flie y parkeo, na gremionan cu a pone premionan disponibel, na artistanan Gloria Feliciana y Erica Moran y sigur Glen Lacle di Stichting Vrienden van het Sport Centrum San Nicolas. Un danki enorme na un y tur cu a bishita y participa, a yuda ‘promociona of a sostene e actividad aki na un of otro manera.