Renato van Putten a splica:
ORANJESTAD (AAN) – Renato van Putten, director di e Club Roy 50-plus, hunto cu Marlon Pietersz y Jacky van Putten, a yama un conferencia di prensa Diaranzon merdia, den cual a referi na un manera di cooperacion entre nan y Club Kibrahacha.
Pa cuminza, van Putten a menciona cu un tempo atras, nan a acerca Club Kibrahacha, y a keda masha entusiasma pa mira con su director señor Jeffrey Matos y señora Arends, a mira e vision cu Club Roy tin pa hunto cu Kibrahacha bin cu un areglo pa nan por yuda esaki den e parti fisico; kiermen cu ehercicio pa miembronan di Club Kibrahacha.
El a splica cu Club Roy-50+ a cuminza aña pasa na Julio, y e idea a nace pasobra nan a mira un necesidad den e pueblo, cu no tin un facilidad unda nan por bin entrena bao guia profesional, un lugar safe cu aparatonan moderno, cu lo por yuda nan pa nan calidad di bida bay dilanti.
“Nos tin un aña ta haciendo esaki y nos tin cu bisa cu resultadonan hopi bunita nos ta hayando cu hendenan di edad, cu ta yegando y nan ta mira mehoranza di nan salud”, van Putten a menciona.
El a señala cu nos comunidad ta birando bieu y cu pa e proximo diez añanan Aruba ta bay ta riba 30% di personanan riba 60 aña, y ta importante pa nan tambe busca nan salud.
“Nos sa cu salud ta caro. AZV ta haciendo su esfuerzonan aworaki pa purba cumpli cu e gastonan, y mi ta kere nos mester bay un poco mas den e prevencion y esey ta na unda nos drenta”, Van Putten a indica.
El a splica cu tin estudionan haci y un di aspectonan di mas importante ta e ehercicio di resistencia y cardiovascular, pa yuda mehora e bida di nos poblacion di edad grandi.
Van Putten hunto cu Jacky, su ruman muher, a dicidi, basta aña atras, pa bin cu e facilidad aki, bao guia profesional. Por ehemplo, Jacky van Putten cu tin mas di 40 aña caba den deporte, Marisela Werleman cu tambe tin mas cu 20 aña den deporte, y nan ta encarga cu guia e grandinan, pa asina nan por haci ehercicio sikiera un par di dia pa siman, pa nan por fortalece y cuida nan salud.
“Pero den e proceso di un aña nos a bin ripara cu un di e problemanan mas grandi ta, transporte. Nos ta haya tur dia yamada di personanan cu kier yega, pero no tin e facilidad ni e capacidad di transporte pa nan por yega”, el a reitera.
Van Putten a bisa cu aki a nace su idea pa acerca Club Kibrahacha, cu e sa cu ta den comunidad hopi fuerte cu e hendenan di edad grandi, cu ta mantene nan cu actividad social y movecion. Y asina nan a acerca señor Matos y señora Arends pa wak con nan por a yega na otro.
