Prome Minister encabesando e delegacion di Reino, a culmina e conferencia di SIDS

A atende 20 reunion den 2 dia 

*Un biaha mas por mira cu Aruba ta hopi adelanta compara cu varios otro isla 

ORANJESTAD (AAN): Diaranson 28 di mei tawata e ultimo dia di reunionnan di Prome Minister Evelyn Wever-Croes na e di 4 Conferencia di SIDS na Antigua & Barbuda. E conferencia di SIDS a conta cu 3500 participante e aña aki, y ta wordo organisa pa Nacionnan Uni cada 10 aña specialmente pa paisnan chikito manera Aruba.

            Na e conferencia di Small Island Development States, paisnan chikito ta haya oportunidad pa trece nan puntonan dilanti y durante e reunionnan cada pais ta scucha di otro pero principalmente nan ta comparti solucionnan y oportunidadnan.

            Prome Minister di Aruba a atende 20 reunion den 2 dia y a encabesa e delegacion di Reino, y a wordo acompaña pa Prome Minister di Corsou, señor Pisas, Minister Plenipotenciario di Sint Maarten, señor Gumbs y despues tambe pa Minister di Economia di Corsou, señor Cijntje.

            Durante e reunionnan a duna hopi importancia na e retonan cu paisnan SIDS ta confronta. E enfoke tawata e cambio climatico y con paisnan SIDS manera Aruba por prepara y principalmente unda mester ayudo pa esaki. Aparte di e tema ey tambe a enfoca riba otro temanan hopi importante manera pobresa y recuperacion despues di e pandemia.

            E mandatario a indica cu awor e echo importante ta pa despues di e reunionnan, pa converti tur compromiso y promesa realmente den accion pa asina yuda di berdad soluciona e retonan cu cada pais ta enfrenta.

            “Mi ta mira atras na dos dia hopi pisa di conferencia pero hopi fructifero. Nos a trese dilanti nos preocupacionnan como pais chikito y unda nos ta kere cu Nacionnan Uni por yuda nos. Un biaha mas mi por mira cu Aruba ta hopi adelanta compara cu varios otro isla y nos compromiso ta pa sigui progresa”, Prome Minister a expresa.