Rino Hermans, director di CMO:
- Den caso cu lo tin efecto di temporada horcan
ORANJESTAD (AAN) Señor Rino Hermans, director di Crisis Management Office (CMO), den conferencia di prensa tocante e temporada di horcan, cu ta inicia oficialmente diasabra awo, 1 di Juni, a bisa cu e ta considera esaki como e antesala di e temporada di horcan 2024.
Hermans a reitera cu e aña aki e temporada ta hopi mas activo den e region Caribense y Atlantico, cu e probabilidad cu mas sistema lo drenta Caribe compara cu añanan anterior cu tabata keda pafo di e region. E aña aki nos lo tin efecto di La Niña den e region.
“E temperatura di awa ta hopi mas cayente pa e region y esaki ta pronostica cu nos ta bay tin 85% mas actividad di horcan. Ta wordo premira tambe cu e dianan activo di tormenta den e region Atlantico, incluyendo Caribe, lo ta doble. Kiermen, si nos ta biba cu 60 dia di horcannan activo ta bay bira 110, y esey ta nifica cu Aruba, su problema mas grandi lo ta awacero y no biento. Historia tambe ta mustra cu cada diez victima ocho ta di awacero”, señor Rino Hermans a informa.
El a agrega cu despues di 18 di Maart, CMO a cuminza prepara pa horcan 61, y nan a deal cu gobierno di Hulanda y ta pak aan e situacion na nivel di Reino, kiermen Aruba no ta su so desampara. El a indica cu KNMI (Royal Netherlands Meteorological Instituut), ta representa e Islanan BES y como Departamento Meteorologico nan ta reuni. Con ta alerta Aruba? Hermans a splica cu Meteo Aruba ta representa nos Isla, Meteo Curacao y Hurricane Center y KNMI lo bay den reunion prome cu saca un alerta.
Director di CMO a bisa cu ta bon pa informa comunidad cu asina un sistema ta wordo activa y mas of menos 20 ora prome ta cuminza cu e proceso huridico pa pidi Minister permiso pa pone Aruba riba alerta, cuminza saca e dienstnan, prepara CMO su capacidad y tur cos y probablemente, 48 ora prome cu e sistema pasa dwars pa noord di Aruba of riba Aruba, pueblo ta wordo informa.
“Kiermen nos ta bay purba pa 2024 pa comunidad no bay den panico”, Hermans a subraya. El a señala tambe cu Meteo ta calcula y ta responsable pa informa CMO, pa Aruba. “Nos no ta igual cu Curacao, nos no ta igual cu Miami. Miami ta duna bo recomendacion kico nan ta wak a base di nan experticia, pero nan no por pone Aruba riba warning. Meteo Aruba no por pone Aruba riba warning, e mester bin CMO cual conhuntamente cu Crisis, Gobierno Ministerraad ta tuma e decision pa pone Aruba riba warning y kico ta e pasonan cu mester tuma”, Rino Hermans a remarca.
