Prome Minister a trata tema di Venezuela cu Minister di Relacionnan Exterior di Trinidad & Tobago

ORANJESTAD (AAN):  Prome Minister Evelyn Wever - Croes tabatin un reunion virtual cu Minister di relacionnan exterior di Trinidad & Tobago sr. Emery Brown.

Trinidad & Tobago tambe ta hopi cerca di e costa di Venezuela mescos cu Aruba, y nan tambe ta experiencia hopi di e problemanan cu nos tambe ta mira akinan, debi na e problemanan interno cu tin na Venezuela. Consecuentemente Minister Brown a pidi un reunion pa trata e tema di Venezuela.

            Durante e reunion ambos mandatario a intercambia di experienciananan. Prome Minister a conta kico tur Aruba ta haci riba e tereno aki entre otro, cu e frontera lo keda cera tanten cu ta na mesa cu autoridadnan Venezolano pa yega na palabracion pa reapertura di e frontera.

            Prome Minister a splica cu den caso cu yega na acuerdo y cu por habri frontera, a pensa di habri esun maritimo prome bou di condicionnan y palabracionnan hopi estricto.

Tambe a papia di e diferente situacionnan/consecuencianan cu ta crea ora cu tin ‘influx’ grandi di personanan di otro pais, y a intercambia di experencianan riba tereno di educacion, labor y cuido medico.

            Premier Wever - Croes a expresa cu e reunion tabata introductorio, den cual a ser a conoci cu e Minister y su vision pa e pais. E temanan trata tabata hopi interesante y banda di e tema di Venezuela, lo sigui den contacto cu otro riba diferente otro tema den futuro.

            Concluyendo Prome Minister a bisa, ‘Locual a resalta di e reunion ta e similaridad di problemanan cu tin entre islanan. Y cu a pesar cu Aruba ta chikito, nos ta confronta cu e mesun tipo problemanan cu islanan mas grandi cu nos, mas stabiel cu nos y cu otro fuentenan di entrada. Pero cu no obstante,  por papia cu otro riba temanan delicado pa yega na mihor solucion pa e pueblo di Aruba y Trinidad & Tobago.