Prome Minister  a gradici  CMB e sosten cu ta brinda na Aruba

 ORANJESTAD (AAN): Prome Minister Evelyn Wever-Croes a hiba palabra na reapertura di e branch na San Nicolas di Caribbean Mercantile Bank (CMB).

Na e ocasion, Prome Minister di Gabinete Wever-Croes II a gradici e banco pa e sosten continuo cu e banco ta brinda na Aruba y pa kere den Aruba su economia den tempo bon y menos bon.

            Durante di e ultimo tempo, mas o menos 1 aña y mey caba, Aruba ta experenciando hopi reto y den e periodo aki cada persona individualmente tambe a experencia diferente reto, algun mas cu otro, y esaki ta conta tambe pa banconan y den caso aki CMB. 

            “Pa ta para akinan na e re-apertura di e branch aki, e ta duna mi confiansa y felicidad cu Aruba lo ta fuerte un bes mas. Mi ta desea CMB hopi exito y na tur e empleadonan, henter comunidad especialmente esnan di San Nicolas, masha pabien y tur e miho deseonan”, Premier Wever-Croes a expresa.