ORANJESTAD (AAN): Awor cu scol a cuminsa, no solamente na Aruba pero na diferente otro pais y e lesnan mayoria di biaha a bira presencial y no online mas,
por mira cu e protocolnan di Covid-19 ta wordo implementa pa e evita contagionan entre e studiantenan, pero tambe por constata cu e variante Delta ta sigui causa un impacto basta grandi na hopi pais rond mundo.
Esaki sigur ta trece cu ne hopi preocupacion pero tambe confusion cerca e mayornan riba e mihor manera di proteha nan yiunan cu ta vacuna of no vacuna. Segun un articulo publica pa CNN, e datonan anterior riba e pandemia a mustra cu e muchanan tabata tin menos probabilidad di bira malo gravemente. Sinembargo, e aparicion di e variante Delta a cambia e reglanan di e wega, ya cu a destrui e mito cu e muchanan sano no por wordo afecta pa e virus. Aworaki, hopi pais , inclui Aruba, Merca y mayoria di e miembronan di Union Europeo, ta ofreciendo vacunanan contra Covid pa muchanan di 12 aña of mas, pero tambe tin hopi otro pais cu ya caba a autoriza e vacuna pa personanan mas jong. Mientrastanto, desigualdad pa loke ta e adkisicion di vacunanan ta persisti na nivel mundial, y hopi pais den desaroyo ta continua lucha pa proporciona e prome y e di dos dosis na e gruponan di riesgo halto, cu e idea di vacuna e muchanan como algo ainda no posibel.
Cuba y e vacuna pa muchanan: Cuba a bira e prome pais di mundo den vacuna muchanan di apenas 2 aña, y e gobierno a bisa cu nan vacunanan di cosecha propio ta safe pa e muchanan mas chikito. Inicialmente Cuba a enfoca den vacuna e trahador di e sector salud, e ancianonan y e areanan mas afecta. Despues, di un aumento den e infeccionnan den e muchanan relata na e variante delta, a anuncia cu tambe lo duna prioridad na e muchanan chikito den un intento pa haci reapertura di e scolnan na un manera safe.
Durante e pandemia, mayoria di e lesnan presencial a wordo suspendi na Cuba. Na su lugar, e studiantenan a siña principalmente a traves di e programacion di e television educativo, ya cu Internet na cas ta algo practicamente inexistente na e isla. Cuba ainda no a proporciona datonan relaciona cu e vacunanan na observadornan externo, pero a bisa cu lo busca e aprobacion di Organizacion Mundial di Salud (OMS/WHO) .
Otro paisnan cu a autoriza e vacuna pa e muchanan: Chile, China, El Salvador y Emiratonan Arabe Uni tambe a aproba vacunanan pa muchanan chikito. Na Chile, e muchanan di 6 aña bay ariba por ricibi e vacuna Sinovac, mientras cu na China, e vacunanan Sinovac y CoronaVac ta autoriza pa su uso den muchanan di 3 aña bay ariba.
Na El Salvador, e muchanan di hasta 6 aña pronto lo por vacuna, mientras cu na Emiratonan Arabe Uni, unda Sinopharm ta aproba pa muchanan di 3 aña, e gobierno a laga cla cu e programa di vacunacion lo ta opcional.
Mientrastanto, e muchanan mericano, entre 5 y 11 aña lo por ta elegibel pa e vacuna na algun momento, den spera di e aprobacion di Administracion di Alimentonan y Remedi di Merca (FDA). E presidente ehecutivo di Pfizer a bisa diamars cu e compania tin planea manda datonan riba nan vacuna di estudionan cu ta involucra e grupo aki di edad pa final di e luna aki.
