ORANJESTAD (AAN): Recientemente por a tuma nota cu e trabaonan na Cas Veneranda situa na Wilhelminastraat 7 a stop y a cera e entradanan di e edificio back.
E proyecto di restauracion no a para pero e prome fase a termina.
Durante e ultimo dos luna y mey, e contratista General Property Services, a haci e demolicion di e cambionan cu a worde haci na aña 1978 pa por a converti e cas den e restaurant Papiamento door di e primonan Martin & Irvin Tauber. Despues famia Ellis a tuma over e restaurant na december 1984 y na fin di 1990 ora nan a muda e restaurant e cas a keda bashi. Sra Landa Merryweather algun aña despues a cera e cas pa adictonan ambulante no por drenta. Asina mes lamentablemente na 2014 tabatin un candela grandi cu a kima e dak completo.
Stichting Monumentenfonds Aruba (SMFA), durante e trabao di demolishon a laga kita tur e cambionan cu a worde haci den pasado y a habri back e “openingnan” cu mester a cera pa evita cu personanan no autorisa por drenta e edificio. Durante e prome fase aki caminda a kita tur locual no ta original por a continua tambe cu e investigacion.
A descubri detayenan, cu no tabata visibel mas, durante e trabaonan di sloop cual a trece algun claridad di con e edificio tabata originalmente. Cu tur e informacion obteni awor lo finalisa e preparacion pa e siguiente fase cu lo ta e restauracion mes na september proximo.
Ademas di e “sloopwerk” a haci e cas completamente limpi paden y tambe e terreno. SMFA a encontra cu hopi sushi riba e terreno na Wilhelminastraat cual tabata uza manera un dump. Danki na e cooperacion di Minister Arends, e team di City Inspector y Serlimar a logra haci e terreno limpi. SMFA kier pidi e comunidad pa coopera pa tene e area limpi durante y despues di e restauracion.
