Ora un Hulandes Caribense ta core den Bus hopi biaha e stul banda di dje ta keda bashi

Interesante evento na Hulanda riba identidad Caribense y discriminacion

ORANJESTAD (AAN): “Mi mag di ta aki?” tabata e pregunta insistente cu a centraliza e evento ‘Empowering my Caribbean Identity’ organiza pa Fundacion WeConnect teni den fin di siman na Den Haag.  E fundacion educacional a reuni hunto como 50 studiante di region Caribense na e ciudad aki na Hulanda.  Pa asina papia di racismo, discriminacion, y sentimentonan di exclusion.  El a converti den un dialogo habri den cual hendenan a mustra nan mes vulnerabel pero na mesun momento a mustra nan forza.

   Doloroso: E pregunta “Mi mag di ta aki?” a forma parti di un sketch pensa y interpreta pa 2 colaborador di WeConnect.  “Nan ta djis mirami of djis mi color?” a keda mantene atencion di publico.  Diferente hoben a comparti nan experiencianan, cu hopi biaha tabata hopi doloroso.  Ora cu a puntra nan riba nan fieldad pa cu Hulanda, durante un entrevista pa trabao.  Cu nan no ta tumabo an serio como Docter pasobra bo ta bin di Curaçao y despues nan ta puntrabo pa bo neutralidad.  Semper bo tin un asiento bashi ora di core den Bus, hasta si otro pasaheronan ta prefera di keda para durante e movimento di Bus.

   Resiliencia: Durwin Lynch, kende ta docente y coordinador di e master di Ciencia di Salud na Vrije Universiteit na Amsterdam, a dirigi e parti di contenido.  El a pone e studiantenan bay den combersacion cu otronan riba momentonan unda nan ta sinti nan mes fuerte of no.  “Braza bo mes” tabata sona alentador y autentico. “Nos kier reforza e ‘resilencia’ y capacidad di recuperacion suministrando un ambiente sigur pa hobennan por a papia.  Ta bunita y conmovedor pa mira con nan a haci esey,” ta loke Tanja Fraai a bisa, kende ta directora di WeConnect.

   Punto di Accion: Un di esnan presente tabata Rabin Baldewsingh, kende desde 2021 ta e Coordinador Nacional contra Discriminacion y Racismo.  Su nomber tambe a aparece riba e famoso listanan di Departamento di Impuesto Hulandes, cu tabata forma parti di e ‘Caso di Toeslag’, segun el a bisa. Ki medidanan concreto e ta mira pa usa nan riba e hobennan di Caribe?  “Lo tabata bon si acaso Gobierno di Hulanda a traha na eliminacion di debenan di estudio,” ta loke el a sugeri.  Baldewsingh aki a ricibi un aplauso inmenso pa su declaracion.

   Aña conmemorativo: Na nomber di Ministerio di Asuntonan Interior y relacionnan di Reino, e Director General Roald Lapperre tabata presente tambe.  El a mustra di a keda hopi impresiona pa e relatonan.  E reunion aki a forma parti di e aña conmemorativo unda a para keto pa cu e abolicion di Esclavitud.  Tanto na Hulanda como den Caribe Hulandes a organiza varios actividad.  E aña conmemorativo ta finaliza dia 1 di Juli 2024, cu e celebracion di Keti Koti.

   Riba e potretnan pa cortesia di Monique Pennings saca special pa WeConnect, por mira e.o. Durwin Lynch dilanti den sala, y tambe studiantenan den combersacion, y e team di WeConnect cu oradornan.