Parlamentario Guedez-Erasmus (MEP):
ORANJESTAD (AAN): Parlamentario di Fraccion di MEP, Darlaine Guedez-Erasmus ta indica cu recientemente den bario di Piedra Plat a habri un cas di dokter.
E cas di dokter aki lo reenforsa e prome liña di cuido y trece mas accesibilidad na e pashentnan cu mester di e cuido y lo amplia e capacidad pa sirbi mas pashent. E enfoke ta ariba e conscientisacion di prevencion den salud y pa motibo cu e apertura di HOED na Piedra Plat lo tin 3 dokter di cas pa ofrece un servicio adicional. E cas di dokter na Piedra Plat lo percura pa duna un servicio mas accesibel, efectivo y eficiente pa pashentnan, Guedez-Erasmus a indica.
“Como Parlamentario hopi biaha e habitantenan di bario di Piedra Plat, Paradera ta acerca mi cu e peticion pa por haya dokternan den bario. Asina ta mas facil pa por yega na momento cu nan mester bay dokter y no mester bay te na Huisartsen Praktijk na Punta Brabo. E peticion aki ta bini principalmente di nos adultonan mayor. Awe e habitantenan por mira cu nan deseo importante aki a bira realidad”, a expresa.
A agrega: “mi kier gradici Gabinete Wever-Croes, Minister di Salud Publico Dangui Oduber y full e team di HOH y AZV. Hoed Piedra Plat sigur lo brinda cada pashent e bon servicio, bon trato medico y hopi atencion. Mi kier felicita e habitantenan di Piedra Plat y becindario cu e ‘Huisartsen Onder een Dak’ den bario”.
