Prome cu opera un pashent di cancer e mester wordo guia y prepara riba diferente aspecto

Heidi Dijkhoff-Lauffer di Cancer Care Center Aruba:

ORANJESTAD (AAN) – Cancer Care Center Aruba, a yama un conferencia di prensa, den cual e Fisioterapista di Lipoedema y di Oncologia, Heidelinde (Heidi) Dijkhoff-Lauffer, a hiba palabra.

Heidi a cuminza bisando cu trahando den e tereno di Lipoedema, e ta topa cu hopi pashent cu tin problema di cancer; mayoria di nan ta pashentnan oncologico.

            “Anto, bo ta tende hopi pregunta, manera ‘na unda mi tin cu bay, kico mi por come, kico mi no por come, mi por haci deporte, mi por traha. Of, mi casa no ta compronde mi, na trabao nan ta bisa ‘abo ta mustra bon, pero mi ta sinti mi malo’. Anto tin hopi problema y nos staf medico aki na Aruba ta haci nan maximo esfuerzo pa yuda tur pashent di cancer, pero e ta un trabao duro, un trabao grandi y tin diferente aspectonan cu ta importante”, Heidi a expone.

            El a bisa por ehemplo nutricion. Kico e pashent ta come. “Bo ta haya chemotherapie, bo ta cuminza bira zwak, kico bo tin cu come y bebe y kico no. Anto, nan ta bisa bo no come nada di sucu, of no haci esaki, of mi tambe a haya chemo pero net awo mi tin gana di bay come un hamburger; pues, tur e cosnan aki ta importante pasobra e pashent mester haya guia riba esey. Y tambe ta hopi importante pa nos bay traha riba dje, pasobra e motibo pa cual nos a bin cu Cancer Care Center ta cu ta cientificamente proba cu ora un persona ta haya e diagnostico, na prome bo tin cu gui’e riba tereno psicologico. No ta tur hende, tin hende ta bay bon. Pero bo tin cu prepar’e pa un ciruhia”, Heidi a comenta.

El a agrega cu por ehemplo cancer na tripa, ta un operacion hopi grandi, hopi invasivo pa e pashent su curpa.

            Si a pashent no tin un bon condicion cardio-pulmonar e tin riesgo 20% mas di haya complicacion, e  por haya problema di curazon, e por drenta cuido intensivo, y hasta e por muri.

            “Door di prepara e persona pa e bay opera, cu un programa intensivo di ehercicio adapta na su capacidad, ta lanta si condicion cardiovascular y pulmonar, y esey ta pone cu e ta reduci e riesgo di complicacion durante e operacion, cu mas di 19%”, Heidi a duna di conoce.

            Esaki door di estudionan realiza den diferente hospital na Hulanda, unda nan no ta ni opera e pashent si e no ta den condicion, pero nan ta mande prepara prome. Asina e Fisioterapista di Lipoedema y Oncologo, Heidi Dijkhoff-Lauffer a splica.