FTA a clausura su ultimo Congreso pa Aña 2023 cu enfasis riba e tema di presupuesto

Hose Figaroa,  presidente:

ORANJESTAD (AAN) – E Federacion di Trahadornan di Aruba (FTA) a clausura su ultimo Congreso pa Aña 2023, e fin di siman aki. Asina su presidente, mr. Hose Figaroa, a duna di conoce den entrevista cu DIARIO.

Un di e temanan cu a wordo trata durante e congreso aki ta e presupuesto di FTA pa 2024. Parti mainta nan a trata tambe e presupuesto di cada delegado, y con pa maneha nan budget, con pa traha nan presupuesto.

Figaroa a bisa cu ta un hecho cu aki na Aruba no ta desconoci cu hopi hende tin problema cu maneho financiero, no solamente pa via di prijsnan cu ta bira mas halto, pero pa problema cu tabata tey caba, y cu ta bira peor cu e aumento di costo di bida cu ta subiendo hopi.

“Nos ta purba di contraresta esey, door di drecha e condicionnan di trabao, pero e hecho cu bo ta haya mas placa pa luna no ta un garantia cu bo ta bay maneha e placa ey na un forma responsable. Pesey, nos a pidi presencia di e Fundacion Plan di Bida, cu ta yuda sanea e finanzas, pa duna un presentacion na nos delegadonan tocante e aspecto financiero”, Figaroa a comenta.

El a señala cu loke miembronan y delegadonan di FTA a haya e dia aki ta parti di un programa cu nan ta haya actualmente na pia di trabao tambe. “Nos a cuminza cu un programa di charlanan na pia di trabao pa e miembronan mes, no solamente pa delegado, pero en general. Nos a haci esaki den un par di hotel y organizacion tambe, prome cu fin di aña tin un par di empresa cu lo haya charlanan y desde Januari di otro aña esaki ta bay sigui. Pues, e concientizacion nos kier haci’e pa e miembresia en general”, Hose Figaroa a reitera.

Figaroa a agrega cu e resultadonan ta bayendo bon, y e ta spera cu e tips cu nan a haya ta wordo tuma hopi na serio pa e delegadonan.