Prome bishita di crusero Oasis of the Seas na Aruba

ORANJESTAD (AAN): Aña a habri, y riba Diaranson a drenta Waf di Playa, e barco crusero ‘Oasis of the Seas’ a bin mara aki pa prome biaha.

   E barco aki cu ta wordo opera door di Royal Caribbean International, tabata e prome cu a sali den su clase di ‘Oasis Class’.  E barconan di e clase aki ta keto bay entre esnan mas grandi na mundo.  Na aña 2026 lo bin un barco nobo di e clase ‘Icon Class’ cu lo bay bira esnan mas grandi entrante e aña ey.

   Oasis of the Seas tabata un barco cu semper antes Royal Caribbean tabata usa den otro ruta.  El a wordo bautisa na November 2009 y su viahe inaugural tabata 5 di December 2009.

   E barco aki por carga 5.600 pasahero (doble ocupacion), y e maximo pasahero cu e por transporta ta 6.699 persona.  E cantidad di tripulacion abordo ta riba di 2.100 persona.

   E barco aki ta 360 meter largo, y 60 meter hancho.  Su haltura riba superficie di lama ta di 72 meter.  E tin total di 18 piso, di cual 16 ta pa uso di pasahero.  El a wordo renoba caba na 2011 y tambe na October 2014.

  Aki por mira momento cu Tugboats di Aruba Ports Authority tabata duna e barco su saludo di cañon di awa ora di drenta Waf di Playa mainta prome cu 8:00 am.  El a keda Diaranson te cu 11:00 pm.

   Oasis of the Seas ta actualmente riba un viahe di 9-dia den parti Zuid di Caribe, y e tema abordo ta ‘New Year’.  El a sali Diabierna 29 di December for di Miami, y a bishita e.o. isla di Coco Cay na Bahamas riba Diasabra, sigui pa dos dia nabegando, y Diamars nan tabata na Curaçao, y Diaranson a bishita Aruba.

   Diabierna awor nan lo ta na Falmouth na Jamaica, y Diadomingo 7 di Januari nan lo drenta bek 6:00 am na Miami.