Consul Mirza Cristina Gneco Plá: --- *Colombia a vota pa elegi Presidente
ORANJESTAD (AAN): Mirza Cristina Gnecco Plá, Consul General de Colombia na Aruba, den un entrevista cu DIARIO, den cuadro di e eleccionnan presidencial cu a tuma lugar Diadomingo 29 di Mei en curso, a menciona cu nan a cuminza cu e proceso di votacion pa 8.30 or di mainta en punto.
Esaki den e ocho mesanan autoriza pa e circunscripcion di e Consulado na Oranjestad, y e proceso a desaroya su mes hopi bon. E hurado y testigonan di mesa tabata hopi puntual, hopi hende a bin vota y no tabata tin ningun incidente, y den un hopi bon ambiente.
Gnecco a menciona cu e circunscripcion den e consulado tin un censo superior na cinco mil ciudadano. Ciudadanonan cu no ta estableci na Aruba por vota, segun e consul contestando un pregunta. Mester presenta su cedula di ciudadania den e Centro di votacion, registra y eherce su derecho.
El a agrega cu e unico entidad competente pa comunica e resultadonan ta e Registraduria Nacional di e Estado Civil. E dama a subraya cu Diadomingo aki a vota na henter Colombia, pa elegi nan proximo Presidente.
“Nos ta spera cu e señor Registrador, manera ta tradicional semper na Colombia, na poco ora despues di e ciere di e mesanan di votacion comunica e resultadonan” Consul sra. Gnecco a expresa.
{gallery}Proceso di votacion na Consulado di Colombia na Aruba a bay hopi bon, puntual y sin incidente{/gallery}
