Colega di prensa Dino Tromp a fayece

ORANJESTAD (AAN): Den fin di siman a drenta e tristo noticia cu colega di prensa, Dino Tromp a fayece na Hulanda cu apenas 56 aña di edad.

Prome cu el a drenta den servicio di Telearuba, Dino tabata traha anteriormente na un compania di Ground Handling na Aeropuerto, unda e trabao fuerte di carga maleta, y caha pa hisa y baha for di avion, a resulta den un bon experiencia pa el a cuminza traha cu cameranan pisa cu recordernan tipo U-Matic cu Telearuba tabatin e tempo ey.

   Su forma pa semper ta netchi bisti, cu su comunicacion hopi social, a pone cu mesora el a cera amistad tur caminda entre periodistanan, y tambe cerca mandatarionan.  Ademas di traha riba caya pa cubri noticia, e tabata fungi tambe como Cameraman pa evento, y e tabata goza di admiracion di directornan tecnico, cu tabata gusta e shotnan cu e ta ofrece durante actividad di transmission pa TV.

   Ademas di graba cu video, e tabata saca potret tambe pa e.o. e corant Bon Dia Aruba, y despues el a cuminza traha tambe cu DIARIO pa cubri suceso riba caya, y actividadnan.

   Dino tabata conoci tambe pa su habilidad gastronomico, pues e tabata habri negoshi pa bende cuminda.  Y durante actividadnan di Dia di Prensa organiza pa Aruba Bank den forma di 'cookout barbecue", e tabata produci delicioso cuminda tambe.

  Aldino Miguel Tromp a nace na Aruba dia 8 di Mei 1966, pues a fayece cu 56 aña di edad.  Na su famia, casa, yiunan, y demas conocirnan, DIARIO ta manda su mas profundo palabra di condolencia.