ORANJESTAD (AAN): E fin di siman aki tabata uno cu un cantidad grandi di turista cu a goza di eventonan manera Soul Beach Music Festival y Aruba Hi-Winds, na unda por a wak cantidad di hende tabata disfruta riba beachnan y riba cayanan.
Diadomingo den oranan di atardi, a presenta un situacion alarmante den avion di JetBlue, na unda un turista a bira malo y no tabata reacciona. Capitan di e avion a bati alarma y a pidi asistencia di ambulance.
Apesar cu paramediconan a purba di reanima e persona, ya e no tabata duna mas señal di bida. A sigui na avisa docter pa constata morto, como tambe Slachtofferhulp pa atende cu e famia di e fayecido. Personal di Cuerpo di Bombero di Aeropuerto a baha e morto for di e avion.
