Reclassering no tin suficiente personal pa acapara e problema
ORANJESTAD (AAN)- Stichting Reclassering no a haci ningun research ainda, tocante e influencia cu media por eherce riba e hobennan cu ta cay den man di husticia. A base di un pregunta cu DIARIO a haci, den entrevista cu e directora, señora Seraida Pemberton-Leonard, el a comenta esey.
Pero si nan ta ripara cu e diferente weganan y cosnan cu e hobennan ta absorbiendo, cu media tin influencia riba e comportacion di e hoben. “Tene cuenta cu e cerebro di e hoben ta na desaroyo, nan ta desaroya nan mente, pues kico nan ta bezig cu ne, nan ta absorbe y esey ta influencia nan comportacion. Cierto weganan cu ta riba social media of riba internet ta influencia con e hobennan ta wak cierto cosnan”, señora Pemberton a indica.
El a agrega cu si tin weganan di matamento of agresividad riba media, e hoben ta asumi esey, y locual Reclassering ta ripara ultimo tempo, ta cu enberdad e agresividad bao di e hobennan, e posibilidad di actua agresivo prome pensa, e ta saliendo mas y mas y no ta conciente cu si nan ta haci algo agresivo sin pensa, nan por coi un arma, nan por dal, nan por haci yen cos y despues nan ta pensa riba e consecuencianan.
“Esey tambe ta un concern cu nos tin pa nos hobennan. Nos kier wak con nos por bin cu algo pa pone e hobennan deal cu nan agresividad”, señora Pemberton a señala.
Na Aruba tin hopi profesional den e rama aki, e problematica ta mucho grandi pa locual e profesionalnan por carga, señora Pemberton a menciona. “Reclassering ta e unico instancia cu ta duna guia obligatorio, y nos tin cu combina guia obligatorio cu guia boluntario, y hopi biaha esey no ta resulta pasobra Reclassering nos ta obliga hoben pa bin cerca nos, pero un instancia boluntario no tin e tools pa obliga esey”, e directora Seraida Pemberton a señala.
El a subraya cu esaki ta haci cu no tur biaha e trayecto ta yega na unda e instancia aki kier pa e yega. “Akinan na Reclassering mes, nos no tin e suficiente trahado pa por acapara e problematica, pasobra nos tin cu bishita e hoben na warda di polis, pasobra si ta un promedio di 140 pa 150 hoben pa aña, bo por wak cuanto e ta pa luna cu e trahado tin cu sali atende cu e hobennan, na warda di polis, atende cu e guia, y cu nan mayornan. Pues, e problematica cu un hoben so ta carga ta basta pisa, pa asina por duna atencion na tur e hobennan”, Seraida Pemberton a enfatiza.
Finalmente, el a agrega cu Reclassering tambe ta bishita e hoben na KIA si e tin cu yega eynan, pero no solo ta atende hoben sino adulto tambe. “Esaki ta nifica cu e reto di mas grandi cu e institucion aki tin, ta e personal. Y tambe tin cu wak e guia pa e hobennan cu bo tin cu keda pro-activo y innovativo pasobra no por pensa cu ta unicamente trece e hoben papia cu ne na oficina y e ta bay bek cas, mester tin proyectonan in place, pa asina tin mas resultado na corto plazo”, señora Seraida Pemberton a conclui.
