Conferencia pa mayornan y educadornan tabata un gran exito

‘Happy Conference’

ORANJESTAD (AAN): Awor cu el a finalisa, por bisa cu confiansa cu e asina yama “Happy Conference” a bira un exito total.

   E prome conferencia grandi organiza pa mayornan, educadornan y entrenadornan cu e tema nos muchanan y hobennan!

   Piso Tres Workcenter a organiza hunto cu un team dinamico un conferencia yama Happy Parents, Happy Children. Un conferencia pa adulto cu enfoke riba nos muchananan y hobennan. E Conferencia a tuma lugar 14 y 15 di November en conexion cu Dia Internacional di Mucha cu lo ta Dialuna otro siman.

   Despues di un seminario exitoso na Piso Tres na 2022, organizadornan Queeny Bergen y Zilha Bruin-Wever hunto cu co-fundador Laura Tromp y un team dinamico a dicidi di organiza un conferencia cu lo duna e comunidad e oportunidad pa bini hunto pa explora diferente strategia inovativo, conoce e mihor practicanan y haya herment y perspectiva valioso riba desaroyo di nos muchanan y hobennan pa asina por lanta un generacion cu muchanan/hobennan mas firme, contento y stabil.

   E conferencia tabata parti den 2 diferente dia, unda cu cada dia lo tin un otro topico, orador y audiencia.

   E prome anochi, Jermin Bell (Psychologo) cu Laura Tromp (Parent Coach) a hiba un combersacion e “Real Talk” unda cu a sa di informa e publico tocante e situacion actual na Aruba abase di estudio y experiencia.

   Despues orador internacional Sara Whaley a papia tocante e comportacion di “toddlers” y con pa reconoce diferente comportacionan y a comparti strategia nan di con por compronde y mehora esaki y a termina e anochi cu Stephanie Pinto un orador internacional (cu su buki best seller From Chaos to Connection) cu a bini for di Australia pa comparti tocante e importancia di tin Inteligencia Emocional pa asina por lanta mucha nan cu esaki tambe.

   Diaranson anochi a cuminsa cu James Sneek (Director di 131) cu hunto cu Laura Tromp a hiba un combersacion e “Real Talk” informando e publico tocante e situacion actual na Aruba abase di estudio y experiencia bou di nos hobennan.

Sigur e favorito di anochi, Johnny Boekhoudt (Psycologo/orador local) a sa di pone e publico hari, yora y sigur ta mas alerta y informa tocante e mente y celebro di un hoben y con importante e rol di mayor, educador y entrenadornan ta basa riba estudio y experiencia.

   Destini Ann Davis, invitado internacional a termina e anochi cu hopi information, practica y hermentnan pa por compronde un hoben y pa tin un communicacion positivo, con pa por mantene confianza, atende cu desacuerdo y hopi mas.

   Tur dos anochi tabata tin un Happy Expo Lounge bon bishita unda cu diferente compania y organizationan a sa di comparti informacion, premio, specials y hopi mas!  Nan ta gradici tur patrocinador.

   E organizacion kier a pidi tur cu a yuda di un forma of otro y tur cu a atende e conferencia un Danki di Curason! Y pa nos ban sigui yuda lanta un futuro generacion mas resistente y feliz.