Prinses Beatrix lo ta presente na celebracion di 25 aniversario di Genootschap Nederland-Aruba

Aki dos siman na Hulanda

ORANJESTAD (AAN): Confirmacion a drenta cu Prinses Beatrix lo bay asisti na e celebracion di 25 aniversario di existencia di Genootschap Nederland-Aruba.  Esaki lo bay ta Diasabra 19 di November 2022 den oranan di atardi.  E hubileo aki ta den cuadro di un vinculo di varios siglo entre e paisnan di Reino.  E celebracion mes lo ta na Theater Diligentia na Den Haag.

   Prinses Beatrix lo bay ta scuchando e discurso di antropologo Francio Guadeloupe encuanto “De erfenissen: over de schoonheid en tragiek van de Nederlandse Cariben’ y di e historiador Gert Oostindie encuanto ‘Het ongemak in de koninkrijksrelaties’.  E guitarista Jean-Jacques Rojer lo ofrece tambe un presentacion.

   Na final, Prinses Beatrix lo papia cu esnan envolvi cu e Sociedad Hulanda-Aruba aki.

   Durante e celebracion di hubileo, e Rector magnificus Viola Heutger (Universidad di Aruba) tambe lo papia riba e futuro di educacion avanza na Aruba.  E escritora Frida Winklaar Domacassé lo bay recita varios poema.

   Sociedad Hulanda-Aruba (Genootschap Nederland-Aruba) a wordo funda na 1997, y tin e meta pa fortalece lazonan entre e dos paisnan di Reino.  Di hopi tempo caba ta existi bon relacion economico, social, educativo, politico, y cultural entre Hulanda y Aruba.  Principalmente e ultimo decadanan particularmente, a profundizacion a ricibi un empuhe, specialmente desde e status independiente di Aruba como pais den Reino na 1986.

   Directiva y participantenan di e sociedad cu base den nan afinidad cu Aruba, kier fortalece e vinculo y stimula interes den Aruba y promove na Hulanda un comprension corecto y balanza di e desaroyonan cultural, social, y politico.