Gobierno di Aruba ta informa:
*Edificio di Hulpbestuurskantoor San Nicolas ta den hopi mal estado
ORANJESTAD (AAN): Gobierno ta informa cu desde 31 di oktober 2022, Hulpbestuurskantoor San Nicolas, cu ta ubica den e edificio di SOGA na San Nicolas, a muda pa Hulpbestuurskantoor Savaneta den MFA Savaneta.
E desicion aki a ser tuma pa motibo cu e edificio di Hulpbestuurskantoor San Nicolas ta den hopi mal estado y ta forma un peliger pa esnan cu ta traha eynan y esnan cu ta bishita e luga. Plannan pa restaura e edificio ta den finalisacion pendiente pa busca un autorisacion di Parlamento.
E mudansa aki lo ta temporalmente pa 6 pa 8 siman mientras ta preparando un otro oficina na San Nicolas mes pa asina Hulpbestuurskantoor San Nicolas sigui brinda ciudadanonan di San Nicolas miho servicio. Como cu ta trata servicio specialisa y ta trata placa, no por ubica e oficina na tur caminda. E trabounan a cuminsa caba.
Durante e temporada aki, nos ta spera cu usuarionan di Hulpbestuurskantoor San Nicolas tin comprension pa e situacion. Gobierno di Aruba no por a laga trahadonan y usuarionan den e riesgonan peligroso.
