Impuesto nobo riba schouder di Colombianonan
BOGOTA: President nobo di Colombia, Gustavo Petro a introduci ya caba su plan economico, y ora cu esaki a bira conoci, un di e plannan cu mas a causa reaccion y comentario ta e reforma cu e kier bin cune pa pone mas impuesto riba cuminda ultraprocesa (‘processed food tax’) y bebidanan yen sucu, esta un tipo di ‘sugar-tax’.
E plan di reforma ta pa impone un impuesto riba nan di 10%, mientras cu pa bebidanan cu sucu aden, esaki lo depende di e cantidad di sucu pa cada 100 mililiter. Gobierno di Petro ta spera cu e impuestonan aki lo bay hinca 25.8 biyon Pesos Colombiano den e prome aña pa caha di Gobierno.
Cuminda afecta: Segun e plan, e proyecto di reforma aki tin como meta pa bay ‘castiga’ cuminda traha manera sausage (chorizo, morcilla, hotdog, salchicha) y e productonan cu contenido halto di sucu.
E lista di cuminda cu Gobierno di Petro kier ‘castiga’ cu e impuesto nobo aki ta:
(1) Carni y productonan agrega di carni, sea den salo, tempera, seco of smoked, hariña of polvo di carni, of producto agrega.
(2) Sausage of productonan similar di carni, resto di cuminda of sanger, preparacion di cuminda a base di e productonan aki.
(3) Otro carni prepara of preserva, resto di carni of sanger.
(4) Batata hasa.
(5) Patacon.
(6) Chicharron empaketa.
(7) Cuki dushi (cu sucu agrega).
(8) Waffle y wafernan (‘obleas’), incluyendo wafernan yena, y waffles (‘gaufres’).
(9) Pancakes y bolo.
(10) Buscuchi y bolo dushi.
(11) Merengues.
(12) Polvo di cacao cu sucu agrega of otro cos dushi.
(13) Mangelnan di chuculati.
(14) Frutanan cubri pa chuculati, y/of otro productonan di confeccion of pasteleria, y otro preparacion di cuminda cu ta contene cacao, cu no ta den bloki, tablet of bara, y cu tin sucu agrega of otro cos dushi.
(15) Articulonan sin cacao (incluyendo chuculati blanco).
(16) Ice-Cream, incluyendo cu cacao.
(17) Solamente postre basa riba lechi, incluyendo arequipe.
(18) Manjar blanco of dulce de leche.
(19) Sauce y sopi.
(20) Cerealnan.
Diadomingo ora cu Gobierno nobo di Gustavo Petro a sinta, el a laga sa cu su gobernacion lo bin cu medidanan urgente pa lucha contra hamber den henter Colombia, y el a bisa cu e lo bin cu reforma pa logra e soberania alimentario.
El a bisa cu e lo busca forma pa Gobierno brinda infrastructura manera sistema di dripsystem pa muha matanan, y demas yudanza manera credito, tecnicanan di cultivo, y mihor simiya pa e campesino por mehora e produccion di cuminda.
Pero cu e plan pa hisa tax riba varios producto, ta pone claramente na bista di tur Colombiano cu e medidanan di dje mas bien ta bay pone cuminda subi di prijs.
