BOGOTA: Riba Diadomingo durante e instalacion di President nobo Gustavo Petro na Colombia,
a pasa durante e ceremonia un video nobo di e himno di e pais, y algo cu a hala atencion ta cu riba dje por mira e artista Karol G.
E video di 2:20 minuut ta mustra imagen di cultura, historia, y poblacion di Colombia, un video cu ta mustra pa manda un mensahe di inclusion na poblacion.
Un di e novedad ta e imagen di e cantante aki cu a hiba su musica y cultura Colombiano pa mundo henter.
E aparicion di Carolina Giraldo (su nomber di berdad) a causa furor riba social media y a crea hopi reaccion.
E cantante ta aworaki den un di su mihor momentonan, como cu su cancionnan ta den diferente Top 20 musical, y ta yenando stadionnan yen rond mundo pa su conciertonan, y participando den diferente festival di musica.
Den e video por a mira tambe Nairo Quintana, e ciclista Colombiano, y tambe deportistanan di e Seleccion Colombia di futbol, tanto di e team femenino como esun masculino.
