Gobierno a bende Ambtenaar 2.5% pa 5%
ORANJESTAD (AAN): E dama docente Gisele-Mireille St. Jago, kende den ultimo eleccion a aparece riba lista di Partido Pueblo Prome, e siman aki a haci un analisis y a nota cu den e presupuesto di 2022 a reserva 18 miyon pa duna e (semi)trahadonan publico y gelijkgestelden nan 5% back di e 12.6%.
Sinembargo a worde bisa cu door cu ta luna juli caba, Gobierno mester paga solamente 9 of 10 miyon.
“Mesora mi a reacciona cu esaki ta algo straño. Pakico ta presupuesta pa full un aña y ta duna nos solamente di 6 luna? Unda e resto di a placa ta bay? Pakico no a scoge pa paga nos dos biaha e 5% pa 6 luna largo? Ta manera Gobierno a tarda cu e presupuesto cu na februari 2022 caba den Rijks Minister Raad a bisa cu e no mester ta un ‘sluitende begroting’ djies pa pasa nos un otro fast ball. Awor atrobe Gobierno y Sindicatonan ta discuti y delibera over di e otro sumanan cu ta cay den e 7.6%? Mientras por djies paga e 12 x 5% den 6 biaha.”
Pa e motibo ey, St. Jago a dicidi cu ta basta. Na dia 5 di mei 2022, dos siman despues cu hues a dicta den e caso cu Gobierno a entema contra Sindicatonan SIMAR Y SEPPA, mi abogado a manda un aviso official pa Gobierno Wever-Croes II, pa nan paga nos e 12.6% back y completamente, incluso tur e placa cu a worde kita desde luna di mei 2020. Mi a studia e veredicto y tambe e veredicto di dia 1 di november 2021 di Corte Constitutional di St. Maarten incluso e arrestnan di Corte Europeo cu a worde uza. Tambe mi a studia e veredicto den e caso lamentable di e Tijdelijke Taakverwaarlozingswet di St. Eustatius di corte di prome instancia. Caminda e hues a inclui un carta di PM Rutte den su contesta.
Algo masha straño. En corto, mi no ta di acuerdo cu e veredictonan pa 3 motibo:
(1) Nos derecho di autodeterminacion ta worde viola structuralmente pa Hulanda desde cu nos a firma e Statuut y cu e exigencianan cu a worde stipula pa nos haya e ayudo financiero durante Covid esaki a keda prueba un biaha mas.
(2) E ley di COHO y e motibo cu a worde uza pa e recorte di 12.6% e ora ey no tin un base legal.
(3) E situacion di e arrestnan Europeo di Grecia y Protugal cu a worde uza como base pa e recorte, no ta comparabel cu e situacion cu nos a pasa door di dje durante e pandemia.
Principio di igualdad: Pero si tur otro hues ta sigui copia e eror cu a tuma luga den e ultimo veredicto di Corte Constitutional di St. Maarten y eynan no tin un opcion pa apelacion, nos mester percura pa nos yega na e mesun corte Europeo pa nan dicta cu nos situacion ta diferente di e casonan di Grecia y Portugal.
Na prome lugar, ley ta bisa cu casonan igual mester haya un trato igual, pues un pais autonomo pero cu no tin 100% autodeterminacion por worde compara cu paisnan soberano cu a hiba mal maneho enbes di a worde confronta cu un pandemia?
Tin hopi mas motibo cu St. Jago a splica den e aviso cu a worde entrega personalmente door di abogado Peter Mohamed dia 6 di mei 2022 cu tabata en total 3 pagina.
“Nunca mi a haya un reaccion directo di Gobierno. Sinembargo riba e dia cu e deadline a vence, es decir dia 20 di mei 2022, Gobierno a anuncia na grandi cu a haya ok di Secretario di Estado Van Huffelen pa nos worde paga 100% back. Fecha no a worde bisa, pero na e momento ey mi a dicidi di warda prome mi bay corte. Mi a warda pa nan por a haya un chens pa cumpli. Y awor cu nan a anuncia di solamente paga mita, mientras cu nan tin full e placa presupuesta, mi ta bay corte.
Tempo pa hiba gobierno corte: Pa e motibo ey, St. Jago a bisa cu el a dicidi di entabla un caso den corte contra e Gobierno aki. Nan a tarda di entrega e presupuesto pa asina nan por a keda sin paga ambtenaarnan 12x 5%, si no 6 biaha 5%.
“Esey ta, manera mi a splica, inhusto. Pero si Parlamento no ta haci uzo di su hermentnan legal pa cuestiona e decision aki, si nos no tin un Ombudsman caminda mi por entrega mi keho, e ora ey ta conne democracia aki ta funciona? Ta ami mes mester bay corte pa pidi hues pa dicta si esaki ta algo legal si of no. No solamente pa nos ambtenaarnan, pero tambe pa proteha futuro generacion. Padobra sin un veredicto di hues den esaki, tur otro Gobierno por wel sigui hiba un maneho asina defruadante sin cumpli cu locual a worde presupuesta y fiha pa Parlamento. Y ora nos keha, lo bisa cu a haci mescos na 2022 y ningun hende a hiba nan corte. Asina tur Gobierno por sigui bende nos “knollen voor citroenen”, automaticamente.”
Mas importante cu tur, ta si e decision pa cu e recorte di e 12.6% tabata basa riba un acuerdo legal entre Gobierno di Aruba y Gobierno di Hulanda. Pasobra nos derecho di autodeterminacion, articulo 73 di Tratado di Nacionnan Uni, ta riba cualkier ley of acuerdo entre paisnan den Reino y ta un derecho humano dobel absoluto cu ni den tempo di guerra ni den tempo di pas por worde viola, un supuesto Ley di ‘Jus Cogens’. Cua ta bisa cu cualkier ley cu ta un violacion di un derecho humano ta ‘Null and Void’ of Nullo. E no tin valides. Pues e no ta conta y tur cos cu ta un consecuencia di esey tampoco no tin valides. Cu otro palabra, si tin un 1 porciento di chens cu nos por haya tur nos placa back pa e motibo cu e pandemia y e lockdown cu a stop henter nos economia di lora, no tabata algo cu nos pais mes a causa, nos mester us’e.
Te ora cu nos haya e total cu a worde presupuesta back, mi ta di opinion cu Gobierno NO a cumpli cu e 5%, cu e aviso cu a worde entrega dia 6 di mei 2022 ta valido ainda y p’esey ami mes, un juffrouw di scol cu un poco conosemento di ley, ta bay hiba Gobierno corte riba titulo personal.
