Presentacion oficial di Cancer Care Center despues di a traha silenciosamente

Heidi Dijkhoff-Lauffer a aporta hopi informacion:

ORANJESTAD (AAN) – Heidi Dijkhoff- Lauffer, Fisioterapista di Linfoedema y Oncologia, na Cancer Care Center Aruba, durante e rueda di prensa, a haci e presentacion oficial di Cancer Care Center Aruba, pasobra CCC a cuminza na un manera silencioso cu un par di pashent, cu resultadonan exitoso.

            Dijkhoff- Lauffer a señala, siguiente cu e tema di operacion, cu despues di e ciruhia, ora e pashent tuma chemoterapie, ta proba cientificamente cu si e ta haci movecion y ta come di manera corecto, e por soporta y carga e tratamentonan miho, y tambe e ta recupera miho y mas lihe.

            “Hasta estudionan a cuminza den caso di cancer na pecho, specificamente, cu e Pashent por baha e riesgo di hay’e bek, cu 40%. Pues, e cifranan cu mi a haya hopi impresionante durante mi estudio y tratando pashentnan, mi a bisa cu ta algo hopi importante pa bin cu ne na Aruba. Na Hulanda e a existi pa un tempo caba, y mi a acerca e señora cu a cuminza cu ne, hunto cu mi coleganan cu tambe a haci e rehabilitacion oncologico, pa haya informacion di estudionan cientifico, pa nos por guia e personanan aki na Aruba”, Dijkhoff-Lauffer a señala.

            Heidi a subraya cu tur hende na Aruba ta conoce hende cu ta sufri di cancer sea famia of amistad, anto den e caso aki, door di duna e guia por logra pa hopi persona.

            “Y si bo tum’e pa termino largo y e persona ta sinti su mes miho, e por regresa trabao mas lihe, loke ta menos gasto pa SVb y pa AZV, pasobra si no tin complicacion e pashent no tin cu bay hospital, no tin cu bay intensive care, ni haya transfusion di sanger, etc. etc”, Dijkhoff a subraya.

El a agrega cu e sistema di cuido aki por traha riba tereno social, financiero y como sociedad. Esey ta e motibo cu a bin cu e iniciativa pa bin cu e Cancer Care Center.

            “Nos a cuminza silencioso cu un par di pashent, nos tin un tremendo resultado cu nan, anto aworaki nos a yega na e punto cu nos a bisa cu nos ta bay oficialmente den publico”, Heidi Dijkhoff-Lauffer a declara.

            Durante e conferencia aki tabata presente docternan, specialistanan, ministernan, personal di hospital, pero e idea ta cu e Centro ta bay duna presentacionnan publico tambe, unda tur hende por haci pregunta tocante e tereno aki.

            Nan ta tres Fisioterapista Oncologico, di cual un ta trata Linfoedema tambe, y tin un terapista cu ta guia e persona si e ta bay traha, por ehemplo y ta consehe si e no por traha 8 ora pa traha 4, y si e no por traha para mas, pero podise e por pa haci’e sinta, pues pa e pashent adapta su capacidad. Tambe e Centro tin un dietista, pa duna conseho, pa come anti-inflamatorio, y ademas tin un psicologo clinico cu ta guia e pashentnan ora nan tin necesidad di esaki, por ehemplo un mama cu bira malo y e tin un yiu di 15 aña cu ta den examen y cu e mucha no por maneha e situacion.”Pues, e ta multidisciplinario, y e pashent ta central den tur esaki”, señora Heidi Dijkhoff-Lauffer a relata.