ORANJESTAD (AAN): Durante e pandemia di Covid a bira hopi cla cu tabata tin un menasa di e suministro di productonan pa e islanan y estadonan chikito den desaroyo den Caribe, manera Aruba.
En particular e suministro di alimento fresco y di bon calidad tabata menasa y no tabata sustenibel.
E siguridad di alimentacion ta parti di e Agenda 2030 di Nacionnan Uni poni den e obhetivo sostenibel number 2 esta Sustainable Development Goal (SDG) 2. E obhetivo aki ta encera cu hamber mester caba por completo y cu mester garantisa cu tur hende ta hay suficiente alimento di bon calidad y nutritivo. Y tambe cu tur mal nutricion lo caba. E sistemanan di produccion di alimento mester bira sostenibel y implementa practicanan di agricultura resiliente.
United Farmers Aruba (UFA) y Dr. Gregory Fung A Fat: Dr. Gregory Fung A Fat, farmaceutico, empresario y ambientalista, ta e presidente di United Farmers Aruba (UFA) y ta un gran promotor na Aruba pa cu produci alimento local na un manera sustenibel. Tecnologia ta un di elementonan clavo pa por alcansa e produccion di alimento sostenibel y tambe pa implementa practicanan di agricultura resiliente.
Durante su presentacion Dr. Fung A Fat lo duna un splicacion di tecnologia cu ya ta existi y tambe un bista den futuro di tecnologia potencial cu ta fatibel aki na Aruba.
UFA a cera dos MOU caba cu Gobierno di Aruba y Universidad di Aruba: KIVI Kring Caribbean – Aruba ta invita tur ingeniero y otro interesadonan pa bin scucha e presentacion aki pa asina aumento e conocimiento tocante tecnologia innovativo pa produci alimento sustenibel y di bon calidad nutritivo.
E actividad aki lo tuma luga na YMCA Calabasstraat 1 Dakota, diahuebs 23 di Februari 2023 di 6:30 pa 7:30 p.m. sigui pa un evenemento social te cu 9 p.m. mientras gozando di drinks y snacks. Pa participa mester registra.