Minister Glenbert Croes gradici cu apoyo ricibi di Aruba Huis y mr. Ady Thijsen

ORANJESTAD (AAN) – Minister di Energia, Glenbert Croes, a menciona den su informacion tocante su viahe na Groningen, Hulanda,

cu terminando su mision aya, ta bolbe Aruba cu e mision y compromiso di realiza e proyecto Hydrogen Valley, riba tereno di e refineria na San Nicolas.

Esaki ta e LNG Valley, cu mester bira e desaroyo nobo pa henter e zona di e refineria. E mandatario ta gradici cu e tremendo apoyo cu e delegacion a ricibi di Aruba Huis, di e companianan estatal di Aruba, di señor Patrick Cnubben, director di Hydrogen Valley, Hulanda.

E mandatario a bisa cu obviamente tin un proceso di educacion pa prepara Aruba su economia y nos poblacion pa e desaroyo nobo aki. Pero sin duda, el a subraya, e ta un gran oportunidad pa un gran futuro nobo, pa Aruba, y pa nos generacionnan di relevo.

E mandatario a reuni tambe cu señor Ady Thijsen na Aruba Huis, cu a ricibie cu un tremendo calor humano di su parti y di e profesionalnan di e Cas di Aruba aya. Nan a combersa riba diferente tema.

Uno ta, con ta bay continua e ehecucion di e proyecto di Aruba Hydrogen Valley, cu e apoyo cu Aruba ta desea di e gobierno di Hulanda y di Bruselas y aworaki e oportunidad cu un consorcio di Hulanda y Spaña hunto, lo haci e desaroyo di e proyecto aki un realidad, mas pronto posible.

Tambe a elabora riba e necesidad, en bista cu aki 30 luna Aruba lo stop di uza heavy fuel oil (HFO), cu ta contaminando Aruba su medio ambiente.

Lo switch pa LNG gas limpi. Aruba Huis lo asisti cu e apoyo cu Aruba mester di gobierno di Hulanda pa finaliza tur e preparativonan pa ehecucion di e proyecto aki.

E mandatario tambe a atende e tema di Aruba su studiantenan na Hulanda. Por lesa al respecto den otro articulo.