Preparacion y siguimento ta esencial pa Tripartite na Corsou

Parlamentario Jennifer Arends-Reyes:

ORANJESTAD (AAN): Den preparacion pa e reunion Tripartite cu lo tuma lugar na Corsou den oktober, parlamentario Jennifer Arends-Reyes, presidente di Comision di Asuntonan di Reino y Relacionnan Exterior, ta destaca importancia di un preparacion serio, cu ta duna continuidad na e temanan trata anteriormente na Den Haag y ta pone e prioridadnan di Aruba riba mesa.

   E encuentro entre e parlamentonan di Aruba, Corsou y Sint Maarten ta ofrece un oportunidad pa fortalece cooperacion y discuti asuntonan di interes comparti. Pa Arends-Reyes, e balor di e dialogo aki ta den e capacidad pa traduci e intercambionan den pasonan concreto, cu responsabilidadnan y siguimento cla.

   E reunion preparativo ta sirbi pa repasa puntonan pendiente, identifica cua informacion adicional ta necesario y prepara e contribucion di Parlamento di Aruba. Den e proceso aki, ta importante pa verifica cua acuerdonan a wordo concreta, cua asuntonan ainda ta pendiente y ken ta responsabel pa e siguiente paso.

   Entre e temanan cu ta exigi siguimento ta e geschillenregeling, of e mecanismo pa trata desacuerdonan dentro di Reino, y e conclusionan y trabaonan di e Petit Comite. Tambe tin atencion pa e evaluacion di e Landspakketten y e cooperacion relaciona cu reformanan. Segun Arends-Reyes, mester tin claridad tocante e progreso di e trayectonan aki, e resultadonan alcanza y e puntonan cu ainda ta exigi atencion.

   E temanan trata anteriormente ta inclui tambe e funcionamento y gobernacion di banco central y e union monetario di Corsou y Sint Maarten. Den e intercambio aki, e experiencia di Aruba cu su propio moneda y banco central ta sirbi como referencia pa comparti conocemento y perspectiva.

   Otro asunto di importancia ta e pasado di sclavitud y e continuidad cu e tema aki mester haya den e dialogo nacional, den Tripartite y den IPKO. Pa Arends-Reyes, un preparacion serio ta permiti identifica e pasonan necesario pa mantene atencion structural pa e tema y duna siguimento na e trabao cu a inicia.

Presidente di e comision ta destaca cu e reunion na Corsou mester construi riba e trabao anterior. Esaki ta exigi un panorama cla di e acuerdonan y compromisonan existente, pa e tres parlamentonan por avanza cu continuidad y un direccion comparti.

   Arends-Reyes ta reafirma su compromiso pa representa e interesnan di Aruba y promove un dialogo basa riba respet mutuo. E meta ta pa e cooperacion parlamentario contribui na progreso concreto riba asuntonan cu ta importante pa e ciudadanonan di Aruba, Corsou y St. Maarten.