Dr. Monica Nuboer, Coordinador Medico ImSan:
ORANJESTAD (AAN)-- Dr. Monica Nuboer Gonzalez, Coordinador Medico di Instituto Medico San Nicolas, den entrevista cu Matutino DIARIO, a elabora tambe riba e aspecto preventivo, pa mantene un calidad di bida, sea sin diabetes, of bon controla.
Aparte di haci chekeonan di control, awendia tur docter di cas tin un POH (Praktijk Ondersteuner Huisartsenzorg).
Dr. Nuboer a splica cu e POH’s a tuma gran parti di tur loke ta e prevencion aki, pero mester di mas.
“Nos tin campañanan durante henter e aña, como ImSan, cu nos ta haci eyfo anto nos ta invita hende pa check nan salud, y nos ta haci’e riba Dia Internacional di Riñon, aña pasa nos a haci un ‘health check’ cu a bisa ‘nos ta un compania grandi, boso bini’, Dia Internacional di Diabetes tambe, anto duna charla, duna entrevista, purba papia over di e problema p’asina bo por yega na mas hende, pasobra mas hende ta bisa cu kier sa mas di esey. Awendia nos tin internet, pero internet por desinforma bo tambe, bisa cosnan cu no ta berdad. Mester wak bon kico ta e fuente di informacion di internet, pero informacion y concientizacion ta hopi importante”, dr. Nuboer a reitera.
Con pa acerca Centro di Diabetes na ImSan, tin un procedure. Esaki ta cu e personanan cu cual docternan di cas no tin POH, ta esnan cu por bin na e Centro aki.
“Nan ta bin cu un carta di nan docter di cas y e ora ey nan ta haya un cita cu un dietista, un nurse specialista den diabetes, y un pedicurist. Y e personanan pa e proyecto ‘anderhalvelijnszorg’ nan mes ta wak e criterionan di e pashentnan, anto nan mes ta yama nan, of si tin hende kier doemee, por yama puntra y si e ta cay bao e criteria nan lo tuma contacto cu ne, y hinc’e den e grupo”, Dr. Nuboer a bisa.
El a comenta tambe cu tin hopi compania cu ta tuma contacto cu e Centro di Diabetes, y nan ta manda un team cerca e lugar, nan ta midi, pisa, ta check cholesterol, sucu y presion. “Anto a base di esey bo ta bisa e persona cu e ta obeso, cu su sucu tabata hopi halto, etc., nos a hacie vooral cu hotel, y a haya hopi hende cu no sa mes cu tin sucu. Esey ta e peliger, ora cu bo no sa, e sucu ta keda haci daño den bo curpa.
