Frans Ponson di CUA:
ORANJESTAD (AAN): Miembro di Comerciantenan Uni Aruba (CUA), Frans Ponson, a duna di conoce cu nan ta haya hopi keho relaciona cu e dificultad pa haci negoshi na Aruba. El a bisa cu comercio ta trece placa den caha di gobierno y nan a papia riba esaki hopi biaha caba cu gobierno ta gusta trece un guera, pero esaki tin cu stop, a remarca.
A agrega cu ta purbando pa drecha esaki cu gobierno pasobra un team e ta. Placa di comercio ta bay den caha di gobierno y placa di pueblo tambe, a expresa.
Ta comercio cu pueblo ta hiba placa pa gobierno. P'esey e ta kere cu mester busca un solucion pa esaki. Si varios comerciante tin un preocupacion pa bisa cu tin un problema eynan, e ora no por hustifica e cosnan aki, a indica.
Pa e motibo aki ta invita e comerciantenan pa participa den e 'Networking Business Event' cu lo tuma lugar diaranson 22 di maart y cu ta wordo organisa door di CUA. Mester haya sa di e preocupacionnan di comercio ya cu ora cu tin mas hende por hustifica e preocupacionnan aki y drech'e tambe pa comercio y pa pueblo, Ponson a declara.
